आदर्श अनलाईन, पोखरा
सर्पको डसाइबाट गम्भीर बिरामी परेका कास्कीको मादी गाउँपालिका–६ तप्राङका १३ वर्षीय विशाल पौडेलको उपचारका लागि दुई लाख ३२ हजार ७२ सहयोग हस्तान्तरण गरिएको छ ।
मादी–४ घर भई हाल जापानमा रहनुभएका मीन पाण्डे क्षेत्री र सङ्गीता पौडेलले सङ्कलन गर्नुभएको सो रकम मादी–४ का वडाध्यक्ष सत्यराज सापकोटामार्फत विशाल पौडेल बचाउ अभियानका संयोजक रवि क्षेत्रीलाई हस्तान्तरण गरिएको हो ।
गत साउन २८ गते घरमै बसेको बेला विषालु सर्पले डसेपछि गम्भीर बिरामी परेका बालकको उपचारमा रकम अभाव भएपछि सहयोग संकलन गरिएको थियो ।
तप्राङवासीले विशाल पौडेल बचाउ अभियान शुरु गरेर अर्थ सङ्कलन समिति गठन गरी स्वदेश तथा विदेशमा रहेका अभियन्तामार्फत सहयोग सङ्कलन गरेर परिवारलाई हस्तान्तरण गर्न शुरु गरेका छन् ।
अभियानका संयोजक क्षेत्रीका अनुसार हालसम्म समितिलाई प्राप्त सहयोग रकममध्ये तीन लाख ५० हजार परिवारलाई प्रदान गरिएको छ । त्यसैगरी अन्य व्यक्ति तथा संस्थाबाट सिधँै परिवारलार्ई तीन लाख हस्तान्तरण गरिएको जानकारी दिनुभयो । आगामी असोज २४ गतेसम्म सहयोग सङ्कलन अभियान जारी रहने बताउँदै उहाँले समितिको खातामा हाल छ लाख ५० हजार मौज्दात रहेको बताउनुभयो ।