आदर्श अनलाइन, बागलुङ
नेपालको सफल उद्योगी व्यवसायीको रुपमा स्थापित बिनोद चौधरीले कोरोना भाइरसको भयावह सँगै उद्योग व्यवसायमा ठुलो संकट सिर्जना भए पनि अब यस भित्रै अवसरको खोजी गर्नुपर्ने बताएका छन् ।
बागलुङ जेसीजद्धारा आयोजित जेसीज सप्ताहको तेस्रो दिन ‘युवा उद्यमशीलता चुनौती र अवसर’ बिषयक भर्चुअल कार्यक्रममा युवाहरुलाई उद्यमशील बन्न आग्रह सहित चौधरीले सबै भन्दा पहिले सकरात्मक सोँच र परिवर्तनका लागि आफुलाई तयार गर्नुपर्ने बताए ।
नेपालीले आफ्नो खेतीयोग्य जमिनलाई बाँझो राखेर भारतबाट खाद्य सामाग्री ल्याइरहेको नमिठो यथार्थ प्रस्तुत गर्दै अब स्थानीय स्तरमै यसका सम्भावना र अवसरको पहिचान तर्फ केन्द्रित हुनुुपर्नेमा जोड दिए । कोरोना महामारीले समस्या मात्र नभएर अहिले धेरै मानिसहरुलाई अवसर पनि सृजना गरेको उनको भनाई थियो । मानिसहरुले अवसरलाई पहिचान गर्न सकेमा विदेशी भुमीमा गएर आफ्नो पसिना बगाउनु नपर्ने चौधरीले बताए । उहाँले अहिले नेपालमा प्रविधिमा आएको परिवर्तनका साथै ज्ञान, सिपको यथोचित प्रयोग गरेर देशमै राम्रो आयआर्जन सहितको उद्योग व्यवसाय गर्ने सम्भावना प्रचुर भएको बताए ।
जेसीजले सप्ताहका अवसरमा रक्तदान सहित बिभिन्न रचनात्मक कार्यक्रम आयोजना गरेको छ । कार्यक्रम बागलुङ जेसीजका अध्यक्ष सुरेन्द्र शाक्यको अध्यक्षता, उपाध्यक्ष एञ्जिला श्रेष्ठको आस्था पाठ र उद्यमशीलता चुनौती र अवसर कार्यक्रमका संयोजक आकृति भण्डारीको संचालनमा कार्यक्रम सम्पन्न भएको थियो ।
कोरोना संकटसँगै आएका अवसरको पहिचान गरौ : बिनोद चौधरी
