आदर्श अनलाइन, बागलुङ
किर्ते नागरिकता सिफासिर गरेको भन्दै जिल्ला अदालत बागलुङले वडा अध्यक्ष सहित पाँच जनालाई पक्राउ पुर्जी जारी गरेको छ ।
बागलुङ नगरपालिका–४ का वडाध्यक्ष ध्रुव बहादुर केसी सहित ५ जनाविरुद्ध जिल्ला अदालत बागलुङले आज पक्राउ पूर्जी जारी गरेको जिल्ला प्रहरी कार्यालय बागलुङका सूचना अधिकारी प्रहरी निरिक्षक विजय भण्डारीले जानकारी दिनुभयो । पक्राउ पूर्जी जारीपछि जिल्ला प्रहरी कार्यालय बागलुङले तत्कालिन वडा नम्बर ४ का वडासचिव प्रेमबहादुर खड्का र किर्ते नागरिकता लिनका लागि साँची बसेका ३० वर्षीय सन्तोष आचार्य पक्राउ परेका छन् ।
अदालतले वडा अध्यक्ष ध्रुवबहादुर केसी, कीर्ते नागरिकता लिने युवकका पिता गूरुदत्त आचार्य र स्थानीय महेन्द्र सापकोटालाई पक्राउ गर्न भनेपछि प्रहरी परिचालन भएको छ । फरक अभिभावक बनाएर दोहोरो नागरिकता लिएको आरोपमा बागलुङ नगरपालिका–६ बाट पंकज सापकोटालाई प्रहरीले यसअघि नै पक्राउ गरिसकेको थियो ।
