तस्बिर सौजन्यः अर्जुन कार्की
आदर्श अनलाइन,बागलुङ
नेपाल पत्रकार महासंघ बागलुङ शाखाले आधुनिक सूचना केन्द्र स्थापना गरेको छ ।
महासंघको अगुवाईमा प्रभु बैंकसँगको सहकार्यमा ५ लाख बढिको लगानीमा आधुनिक सूचना केन्द्र सञ्चालन गरेको हो ।
गत मंसिरमा मात्रै ‘हामी सबैको रहर, पत्रकार महासंघ बागलुङको घर’ अभियान मार्फत सुुविधा सम्पन्न भवन निर्माण गरेको महासंघले सोही भवनमा बहुउद्धेश्यीय आधुनिक सूचना केन्द्र स्थापना गरेको हो । केन्द्रको प्रभू बैंकका प्रमुख कार्यकारी अधिकृत (सिइओ) अशोक शेरचनले उद्घाटन गर्नुभयो । उद्घाटन पछि बोल्दै सिइओ शेरचनले सूचना केन्द्र अहिलेको समय र समाजका लागि अपरिहार्य भएको बताउनुभयो । उहाँले अब सदरमुकाम बाहिर गलकोट, बुर्तिबाङ, जैमिनी र बरेङमा पनि सूचना केन्द्र निर्माण गर्नुपर्ने र यसमा बैंकले आवश्यक सहयोग गर्ने प्रतिवद्धता व्यक्त गर्नुभयो ।
सूचना केन्द्रमा हाल १० वटा कम्प्युटर सञ्चालनमा छन् । यसमा बिद्युतीय पुस्तकालय पनि बनाउने लक्ष्य राखेको छ । साथै पत्रकारका लागि आवश्यक सन्दर्भ सामाग्रीको रुपमा चाहिने र अन्य राष्ट्रिय अन्र्तराष्ट्रिय महत्व राख्ने पुस्तक समेत राखिने नेपाल पत्रकार महासंघ बागलुङका अध्यक्ष दिल शिरीषले बताउनुभयो ।
जिल्लाका पत्रकारलाई एकसाथ समाचार सम्प्रेषणमा सहजता, आम नागरिकको पहुँच र पठन सँस्कृतिको विकासका लागि आधुनिक सूचना केन्द्र स्थापना गरिएको अध्यक्ष शिरीषको भनाई छ ।
कार्यक्रममा प्रमुख जिल्ला अधिकारी सुरेश न्यौपानेले बागलुङका पत्रकार र पत्रकार महासंघको एकतावद्व प्रयासले महत्वपूर्ण सिर्जनात्मक कार्य भएको भन्दै खुसी व्यक्त गर्नुभयो । ‘पत्रकार महासंघले नागरिक स्तरमा अभियान चलाएर भवन निर्माण मात्रै गरेको छैन, अन्य रचनात्मक कार्य र मेहेनत प्रशंसा योग्य छ,’ प्रजिअ न्यौपानेले भन्नुभयो, ‘पत्रकारितालाई थप विशिष्टिकृत अझै बनाउन आवश्यक छ ।’
कार्यक्रममा महासंघका निर्वतमान अध्यक्ष मुकेशचन्द्र राजभण्डारी र राष्ट्रिय उपभोक्ता मंच बागलुङका अध्यक्ष शैलेन्द्रकुमार श्रेष्ठले पनि मन्तव्य व्यक्त गर्नुभएको थियो ।
कार्यक्रम नेपाल पत्रकार महासंघ बागलुङका अध्यक्ष दिल शिरिषको अध्यक्षता, सचिव राम थापा अविरलको संचालन र कोषाध्यक्ष बिजय रानाको स्वागतमा सम्पन्न भएको थियो ।