फाइल तस्बिर
आदर्श अनलाइन, बागलुङ
निसीखोला गाउँपालिका वडा नम्बर ३ धारखर्कमा आगलागी हुँदा २५ बाख्रा जलेका छन् ।
शुक्रबार बिहान आगलागी हुँदा स्थानीय विक्रम विकको २५ वटा बाख्रा जलेको प्रहरी चौकी झिवाखोलाका प्रमुख जितु शाहले जानकारी दिए ।
बिहानको समयमा बाख्रालाई दाना खुवाउनका लागि पानी तताउने क्रममा बाख्राको पाठोले आगो उछिट्याएपछि आगलागी भएको पीडित विकले बताए ।
‘पानी बसालेर म बाहिर गाको थिएँ, बाख्राको पाठोले अगो उछट्याए र आगो लागेछ, आउँदै सबै जलेर खतम भएछ,’ उनले भने ‘१५ वटा ब्याउने बाख्रा थिए, अरु साना–साना थिए, गोठ कहाँ थियो भन्ने पनि अनुमान गर्न नसकिने भएको छ ।’
बाख्रासँगै ६ वटा कुखुरा, ५० हजार नगदसहित गोठमा भएको सघाँसपात र दारपात सबै जलेर खारानी भएको पीडित विकको भनाई छ ।
आगलागीमा परि ११ वटा बाख्रा मरेका थिए भने १४ वटा गम्भीर घाईते भएका थिए । घाइते बाख्रा पनि मर्ने अवस्थामा पुगेछि विकले गाउँलेलाई वितरण गरेको बताए ।
आगलागीमा के कति क्षति भयो भन्ने यकिन नभएको भन्दै विवरण तयार हुँदै गरेको प्रहरीले जनाएको छ ।