आदर्श अनलाइन, बागलुङ
नेपाली कांग्रेस निकट नेपाल महिला संघ बागलुङले बैतडीकी १९ वर्षीया किशोरीको बलात्कार पछि भएको जघन्य हत्यामा सम्लग्नलाई तत्काल कारवाहीको दायरामा ल्याउन माग गरेका छन् ।
बैतडी जिल्लाको दोगडाकेदार गाउँपालिका वडा नम्बर ७ चडेपानीकी १९ वर्षीया भागिरथी भट्ट शुक्रबार उनको घर नजिकै मृत अवस्थामा फेला परेकी थिइन् ।
नेपाल महिला संघ बागलुङले आइतबार प्रेस विज्ञप्ती जारी गर्दै अहिलेको सरकारले आपराधिक गतिविधि गर्नेलाई कारवाहीको दायरामा नल्याउँदा यस्ता खालका घटना बढ्दै गएको उल्लेख गरेको छ ।
संघकी अध्यक्ष शकुन्तला शर्मा र सचिव उषा पौडेलद्वारा हस्ताक्षरित विज्ञप्तीमा–‘विगतका दिनहरुमा निर्मला पन्त, सम्झना बिक लगायतका छोरी चेलीहरुको बलात्कार गरि हत्या गरिएका घटनामा संलग्न अपराधीलाई कानुन बमोजिम कारवाही गर्नुको साटो सत्ता र शक्तिको आधारमा अपराध र अपराधीलाई संरक्षण गर्दा जयन्य अपराधले निरन्तरता पाइरहेको उल्लेख छ ।’
संघकी अध्यक्ष शर्माले मुलुकको नेतृत्व गरेको पार्टी भित्रको आन्तरिक कलह र झगडाका कारण नागरिकको स्वास्थ्य, शिक्षा, रोजगारीका कुरा त ओझेलमा परेको भन्दै यस्ता खाले जघन्य अपराधका घटनामा संलग्न अपराधीलाई छिटोभन्दा छिटो छानविन गरि कानुनको दायरामा ल्याइ कारवाही गर्न माग गर्नु भयो । उहाँले सरकार यस्ता घटनाहरुको छानविन गर्न आनकारी गरिरहेको भन्दै अब पनि उदासिन देखिएमा नेपाल महिला संघ न्यायको लागि थप आन्दोलन गर्ने चेतावनी दिनुभयो ।
संघकी सचिव उषा पौडेलले दिनदहाडै महिलाहरु बलात्कृत पछि हत्या हुने घटना बढ्दै गएकाले यसमा सरकार उदासिन बनेको बताउनुभयो । उहाँले बागलुङ पनि यस्ता घटनाहरु भइरहेको भन्दै रुपा गौतमको हत्यारा समेत अझै पत्ता लगाउन नसकेको बताउनुभयो ।
महिला संघ बागलुङद्वारा बैतडीकी किशोरीको हत्यारालाई कारवाहीको माग
