भारतीयको अपमानजनक अभिव्यक्ति रोकियोस्

सम्पादकीय
भारतको उत्तरपूर्वी त्रिपुरा राज्यका मुख्यमन्त्री विप्लवकुमार देवले गृहमन्त्री अमित शाहलाई उदृत गर्दै नेपालमा भाजपा सरकार गठन गर्ने विवादास्पद अभिव्यक्ति दिए पछि पुनः एक पटक नेपाल तरंगित छ । गत शनिबार त्रिपुरा गएका भारतीय जनता पार्टीका पूर्व अध्यक्ष समेत रहेका शाहले पार्टी बैठकमा भारतका सबै राज्यहरूमा भाजपाको सरकार बनाइसके पछि नेपाल र श्रीलंकामा पनि भाजपा विस्तार गरेर त्यहाँ पनि बिजेपीको सरकार बनाउन चाहेको बताएको इस्ट मोजोले लेखेको छ । यो किन र कुन नियतले बारबार सिंगो देश माथि धावा बोल्ने गरि आइरहन्छ ? र हाम्रो कुटनीतिक निकाय र सरकार मौनता साँधिरहन्छ ? यो अवश्य गम्भीर विषय हो ।
नेपालका विषयमा भ्रामक र दुष्प्रचारपूर्ण अभिव्यक्ति दिने, टिप्पणी गर्ने देव या शाह पहिलो भारतीय राजनीतिज्ञ होइनन् । यो कैयन वर्षदेखि दोहोरिरहेको नेपालको नियति हो । यसमा भारतका राजनीतिज्ञ मात्रै होइन, भारतीय सञ्चारमाध्यम र पत्रकारको भूमिका पनि उस्तै नकरात्मक देखिन्छ । विगतका केही घटना मात्रै केलाउने हो भने पनि त्यस किसिमका दुष्प्रचारलाई सघाउन भारतीय सञ्चारमाध्यमको भूमिका अहम् देखिन्छ । केही महिना अघि मात्रै जि न्यूजका एक भारतीय पत्रकारले सगरमाथा भारतको भएको आशय हुने गरि सनसनीपूर्ण खबर दिए । सन् २००० मा भारतको प्रतिष्ठित खबरपत्रिका इन्डिया टुडेले ‘द नेपाल गेम प्लान’ भन्ने लेख छाप्यो । भारतीय खुफिया एन्जेसी रअको रिपोर्टमा आधारित उक्त लेखमा नेपाललाई आतंकवादीको स्वर्गकै रूपमा चित्रण गरियो । पूर्वराष्ट्रपति प्रणव मुखर्जीको संस्मरणात्मक पुस्तक ‘द प्रेसिडेन्सिअल इअर्स’ मा समेत नेपालसम्बन्धी तथ्यहीन र दुष्प्रचारपूर्ण सामग्री समावेश छ । उनको पुस्तकमा नेपालका तत्कालीन राजा त्रिभुवनले भारतीय प्रधानमन्त्री नेहरूसमक्ष नेपाललाई भारतको एउटा प्रान्त बनाउन अनुरोध गरेको उल्लेख छ । तर, यसका बारेमा नेपालले कडा प्रतिवाद गरेन ।
अहिले भारतका गृहमन्त्री र मुख्यमन्त्रीले जे नेपालका बारेमा अभिव्यक्ति दिएका छन् । त्यो नेपाल जस्तो सार्वभौम मुलुकका लागि आपत्तिजनक विषय हो । यस्तो हेपाहा र अपमानजनक अभिव्यक्ति भारतिय राजनीतिज्ञले बेला बेला दिएर नेपाल भारतको छत्रछायामा छ या हुने घुमाउरो सन्देश दिन खोजिरहेको प्रष्ट हुन्छ । यसका बारेमा नेपाल सरकारले सामान्य चासो त राख्छ तर गम्भीरतापूर्वक यस्ता सवालमा संवाद नगरेको देखिन्छ । जसका कारण पटक पटक एकै खालको घटना र प्रवृत्ति दोहोरिरहेको छ । अहिलेको अभिव्यत्तिका बारेमा पनि गम्भीरतापूर्वक सिधा संवाद गर्न जरुरी छ । र यस्तो एक सार्वभौम देश प्रतिको बारबारको अपमानजनक अभिव्यक्ति बन्द गरोस् ।