आदर्श अनलाइन, बागलुङ
सहकारीका सदस्यहरुलाई सक्रिय बनाइ आर्थिक तथा सामाजिक रुपमा अगाडि बढाउने उद्देश्यका साथ बलेवा एकता वचत तथा ऋण सहकारी संस्थाले २ दिने वित्तीय साक्षरता तथा ऋण व्यवस्थापन तालिम शुरु गरेको छ ।
बागलुङ नगरपालिका वडा नं. १४ नारायणस्थानमा सञ्चालित संस्थाले अमलाचौर सेवा केन्द्र अन्तरगतका शेयर सदस्यहरुका लागि २ दिने तालिम आयोजना गरेको हो ।
बानपा–१२ अमलाचौरमा रहेको सेवा केन्द्र अन्तरगतका शेयर सदस्यहरुलाई सहभागी गराई वित्तीय रुपमा सचेत बनाउनुका साथै संस्थासंगको सम्बन्ध बढाउनका लागि तालिम आयोजना गरिएको संस्थाका प्रवन्धक भरत पौडेल (बागलुङे) ले जानकारी दिनुभयो ।
सहकारी ऐन, नियम र संस्थाको विनियम तथा कार्यविधिहरुका आधारमा संस्थाले सञ्चालन गर्ने सेवामा सदस्यको सक्रिय सहभागिता, सहकारीको मर्म र भावना अनुसार संस्थाको व्यवसायमा संलग्नता तथा संस्थाको रणनीतिक योजना अनुसार संस्थालाई अगाडि बढाउनका लागि सदस्यहरुको सहभागिताका लागि तालिम सहयोगी हुने संस्थाले जनाएको छ ।
तालिममा सहजीकरण गर्दै राष्ट्रिय सहकारी बैंकका सञ्चालक राम बहादुर जिसीले सहकारीलाई प्रभावकारी रुपमा अगाडि बढाउनका लागि सक्रिय सदस्य, क्षमतावान सञ्चालक र दक्ष कर्मचारीहरुको आवश्यकता पर्नेमा जोड दिनुभयो ।
सहकारीका मालिक सदस्यहरु हुन्, सदस्यहरुले आफु मालिक भएको महसुस गर्ने गरी सहकारी सञ्चालनका लागि सहकारी शिक्षा, सहकार्य र समन्वय आवश्यक रहेको उहाँको भनाइ थियो ।
तालिमको उद्घाटन कार्यक्रममा बागलुङ नगरपालिका वडा नं. १२ का वडा अध्यक्ष गुरुदत्त पाठकले स्थानीय जनताको आर्थिक विकासका लागि सहकारीहरुको भूमिका प्रभावकारी हुनु पर्नेमा जोड दिनुभएको थियो । उहाँले सहकारीहरुलाई एकीकरण गरी प्रभावकारी रुपमा सञ्चालनका लागि वडा कार्यालयले संयोजन गरेर अगाडि बढ्ने प्रतिवद्धता समेत व्यक्त गर्नु भएको थियो ।
कार्यक्रममा नेकपा एमालेका भविश्वसर रेग्मी, नेपाली कांग्रेसका ढाकाराम पौडेल, नेकपा (माओवादी केन्द्र) का भोजराज पाध्या, राष्ट्रिय जनमोर्चाका गोविन्द प्रसाद पौडेल लगायतले शुभकामना मन्तव्य व्यक्त गर्नु भएको थियो ।
कार्यक्रम बलेवा एकता साकोसका अमलाचौर सेवा केन्द्र व्यवस्थापन समितिका अध्यक्ष घनश्याम सुनारको अध्यक्षता, उपाध्यक्ष कोपिलामणी ढकालको स्वागत र संस्थाका प्रवन्धक भरत पौडेलको सञ्चालनमा सम्पन्न भएको थियो ।
आफ्नै सुविधा सम्पन्न भवनबाट कारोबार सञ्चालन गरेको संस्थामा हाल २ हजार जना शेयर सदस्य, २ करोड ६ लाख शेयर रकम, २५ करोड बचत, १४ करोड कर्जा लगानी रहेको प्रवन्धक पौडेलले जानकारी दिनुभयो ।