आदर्श अनलाइन, बागलुङ
गण्डकी प्रदेशमा सत्ता समीकरणको निर्णायक शक्ति बनेको राष्ट्रिय जनमोर्चाका सांसद खिमविक्रम शाही संसदमा अनुपस्थित भएपछि देशव्यापी तरंग पैदा भएको छ ।
आजको सामाजिक सञ्जाल पक्ष र विपक्षका प्रतिक्रिया सहित यसै विषयले रंगिएको छ ।
सम्पर्कविहीन भनिएका राष्ट्रिय जनमोर्चाका प्रदेशसभा सदस्य शाही अस्पतालमा कोभिड–१९ उपचार गर्ने आईसीयूमा भेटिनु भएको छ । यद्यपि उहाँको कोरोना परीक्षण रिपोर्ट नेगेटिभ छ ।
प्रदेशसभा सदस्य शाही पोखरास्थित चरक अस्पतालको कोभिड वार्डको आईसीयूमा भेटिनु भएको हो । उहाँसँगै कांग्रेस प्रदेशसभा सदस्य मनकुमारी गुरुङ बुधबार विहान अस्पतालमा भर्ना भएको अस्पतालका निर्देशक कपिल पोखरेलले बताउनुभयो ।
प्रदेशसभा सचिवालयले गरेको पीसीआर टेष्टमा शाहीको रिपोर्ट नेगेटिभ आएको थियो । तर अस्पतालमा पोजेटिभ रिपोर्ट देखाएर भर्ना भएको पोखरेलले बताउनुभयो । उहाँले भन्नुभयो, ‘हामीसँग कोरोनाका ४२ बिरामी छन्, उहाँ पनि एक हो ।’
गण्डकी प्रदेशको प्रदेशसभाको बुधबार बसेको पहिलो बैठकमा मुख्यमन्त्री पृथ्वीसुब्बा गुरुङविरुद्ध दर्ता भएको अविश्वासको प्रस्तावमा छलफल भएको थियो ।
अपराह्न साढे ४ बजे बोलाइएको प्रदेशसभाको दोस्रो बैठक सुरु हुनु अघि राष्ट्रिय जनमोर्चाकी प्रमुख सचेतक पियारी थापाले प्रदेशसभा सदस्य शाही सम्पर्कविहीन भएको भन्दै बैठक रोक्न माग गर्दै प्रदेश सभामा निवेदन दिनुभयो । लगत्तै सभामुखले अर्को सूचना नआउँदा सम्म प्रदेशसभाको बैठक स्थगित गर्नुभयो ।