आदर्श अनलाइन, बागलुङ
धौलागिरी आयुर्वेद औषधालय बागलुङले जिल्लाका विद्यार्थी तथा शिक्षकहरुका लागि विद्यालय आयुर्वेद तथा योग शिक्षा कार्यक्रम संचालन गर्ने भएको छ । यस कार्यक्रम मार्फत विद्यार्थीलाई दैनिक स्वास्थ्य शिक्षा तथा योग सिकाउने छ ।
औषधालयले आगमी असार १ गतेदेखि जिल्लामा कक्षा ५ भन्दामाथि अध्ययन गर्ने विद्यार्थीहरुका लागि दैनिक स्वास्थ्य सम्बन्धि क्रियाकलापका विषयमा र योग सिकाउने औषधालयका प्रमुख डाक्टर सरोज कुमार रायले जानकारी दिनुभयो ।
उहाँले ‘समृद्ध नेपालको लागि स्वास्थ तन, मनयुक्त प्रतिभा निर्माण’ भन्ने नाराका साथ विद्यार्थीहरुलाई जुम मार्फत दैनिक स्वास्थ्य सम्बन्धि शिक्षा दिइने रायले बताउनुभयो । कोभिडा–१९ का कारण विद्यार्थीहरुलाई नकरात्म असर पुगेको भन्दै उनीहरुलाई शारिरीक तथा मानिसक रुपमा स्वास्थ रहने वातवरण सिर्जना गर्नुका सार्थै दैनिक चुस्त दुरुस्त र सक्रिय राख्नका लागि विद्यालय आयुर्वेद तथा योग शिक्षा कार्यक्रम संचालन गर्न लागिएको बताउनुभयो ।
विद्यार्थीका लागि औषधालयले जुम आइडी प्रदान गर्ने र सोही अनुसार जुममा जोडिएर कार्यक्रममा सहभागि हुन सकिने उहाँको भनाई छ । विद्यार्थीहरुले zoom id: 7476598996 Passcode: Ayurveda मार्फत हरेक दिन विहान साढे ५ बजेदेखि ४८ मिनेट योग गर्नुका साथै स्वास्थ्य शिक्षा लिन सक्ने रायले बताउनुभयो ।
औषधालयले कुश्मिसेराको हिमालयन आवासीय मावि र बेलबगरको संस्कृत माविमा आयुर्वेद तथा योग शिक्षा कार्यक्रम संचालन गरिसकेको छ ।
