आदर्श अनलाइन, बागलुङ
नेपाल पत्रकार महासंघ बागलुङ शाखाले कोभिड–१९ रोकथाम तथा संक्रमितको उपचारका लागि बागलुङका पालिकाहरुलाई स्वास्थ्य उपकरण तथा स्वास्थ्य सामग्री प्रदान गरेको छ ।
कोरोनाको दोस्रो लहर समुदायमा फैलिएको र मानवीय क्षतिसमेत बढी हुन लागेकोले महासंघले कोरोना रोकथाम, नियन्त्रण र उपचारमा स्थानीय सरकारलाई थप सहयोग पुगोस् भनी काठेखोला गाउँपालिकालाई स्वास्थ्य सामग्री उपलब्ध गराएको नेपाल पत्रकार महासंघ बागलुङ शाखाका अध्यक्ष नरेश कँडेलले जानकारी दिनुभयो ।
दुई थान अक्सिजन कन्सन्ट्रेटर, मास्क, सेनिटाइजरलगायतको स्वास्थ्य सामग्री महासंघका अध्यक्ष कँडेलले काठेखोला गाउँपालिकाका अध्यक्ष अमर थापालाई हस्तान्तरण गरेको हो ।
गाउँपालिकाको स्वास्थ्य शाखालाई एक थान अक्सिजन कन्सन्ट्रेटर र लेखानी स्वास्थ्य चौकीलाई एक थान अक्सिजन कन्सन्ट्रेटर उपलव्ध गराएको पत्रकार महासंघले जनाएको छ ।
काठेखोला गाउँपालिकालाई उपलब्ध स्वास्थ्य सामग्रीले कोरोना रोकथाममा सहयोग पुग्ने र स्वास्थ्यकर्मींहरुको मनोबल पनि उच्च हुने काठेखोला गाउँपालिकाका अध्यक्ष अमर थापाले बताउनुभयो ।
यस अघि महासंघले गलकोट नगरपालिका र ताराखोला गाउँपालिकालाई स्वास्थ्य सामग्री प्रदान गरि सकेको महासंघको सचिव विजय रानाले बताउनुभयो ।