आदर्श अनलाइन, बागलुङ
कोरोना भाइरस (कोभिड १९)को दोस्रो लहर अगाडि दैनिक एक सयको हाराहारीमा बन्जी गर्न पर्यटक पुग्ने कुश्मा–बागलङको बन्जी पुल कोरोनाका कारण पुनः बन्द भयो । पहिलो लहरका कारण सञ्चालनमा ढिलाई भएको पर्वतको कुश्मा र बागलुङ जोड्ने गरी कालीगण्डकीको खोंचमा निर्माण भएको बन्जी र स्वीङ कोरोना कहरले बढी प्रभावित भएको छ ।
२०७७ कात्तिक १५ बाट सञ्चालनमा आएको बन्जी केही समयमै कोरोनाका कारण बन्द भएको थियो । कोरोनाको दोस्रो लहर अघि पर्यटकले भरिभराउ भइरहेको समयमा पुनः बन्द हुन पुगेको बन्जी र स्विङ पुल अहिले फेरि साहसिक पर्यटकको पखाईमा छ ।
झण्डै २० करोड भन्दा बढी लगानीमा सञ्चालनमा आएको बन्जी निषेधाज्ञा खुकुलो भएसंगै पुनः सञ्चालनमा आएको बन्जी र स्विङ सञ्चालन गर्ने द क्लिफ प्रालिले जनाएको छ । दोस्रो लहर पछि बन्द भएको उक्त साहसिक परियोजना निषेधाज्ञा खुकुलो भएसंगै स्वास्थ्य मापदण्ड अपनाएर एक हप्तादेखि सञ्चालनमा आएको द क्लिफ प्रालिका अध्यक्ष राजु कार्कीले जानकारी दिनुभयो ।
द क्लिफ प्रालि अन्तर्गत बन्जी, स्विङ, स्काई साइक्लििङ र बागलुङ नगरपलिका–१४ नारायणस्थानमा द क्लिफ रिसोर्ट समेत सञ्चालनमा छ । निषेधाज्ञामा स्काई चियर, प्राथना हात लगायतमा अन्य संरचना थपिएका छन् । उक्त संरचना बागलुङको बलेवामा छन् ।
“अहिले २०÷२५ जना पुलको र रिसोर्ट अवलोकन गर्ने र ८÷१० जनाले बन्जी र स्विङ गर्न थालेका छन्, स्वास्थ्यका मापदण्ड अपनाएर एक हप्तादेखि शुरु गरेका छौं,” अध्यक्ष कार्कीले भन्नुभयो “दुई महिना ठप्प भयो, अहिले त कर्मचारीलाई तलब खुवाउन पुग्ला, पूर्ण रुपमा कोरोना साम्य नभए सम्म लक्ष्य अनुरुपको साहसिक पर्यटक आउन समस्या छ, हामीलाई मुस्ताङ जाने र म्याग्दी, मुस्ताङ लगायतका पदमार्ग खुल्ला भएमा बल्ल साहसिक पर्यटक आउनेछन्, अहिले साहसिक पर्यटकको पखाईमा छौं भन्दा हुन्छ ।” उक्त प्राली अन्तर्गतका साहसिक खेल र रिसोर्टमा ७० जना कर्मचारीले रोजगारी पाएका छन् । ५० प्रतिशत बाह्य पर्यटकको अपेक्षा गरेको बन्जी र स्विङमा अहिले आन्तरिक पर्यटक मात्र छिटफुट आउन थालेको जनाएको छ ।
कालीगण्डकीको खोंचमा पर्वतको सदरमुकाम कुश्मा र बाग्लुङको बलेवा जोड्ने आधा किलोमिटर लामो पुल बनाएर बन्जी, स्वीङ र स्काइ साइक्लिङ लगायत सहासिक खेल सन्चालन पर्यटकको प्रमुख आकर्षण बन्दै गए पनि कोरोनाका कारण पहिलो गासमै ढुङ्गा जस्तो भएको छ । २०७३ सालदेखि पुलको निर्माण सुरु गरिएको थियो भने पुल संगै रिसोर्टको निर्माण २०७६ मा सकिएको थियो ।
५२५ मिटर लामो झोलुङ्गे पुलको बिचमा कालीगण्डकी नदीको ठीक माथी बन्जी र स्वीङको लागि जम्प गर्ने प्लाटफर्म छ । खोला देखि पुलको उचाई २२८ मिटर छ । कम्पनीले विश्वकै दोस्रो अग्लो बन्जी र विश्वकै अग्लो स्विङ भएको दावी गर्दै आएको छ । नेपालका अन्य स्थान भन्दा अग्लो र फरक भौगोलिक वातावरणका कारण यहाँको बन्जी र स्विङ प्रति धेरैको आर्कषण छ ।
बन्जी र स्वीङ दुबैको मुल्य ७ हजार तोकिएका छ भने जोडी स्वीङको १२ हजार शुल्क तोकिएको छ । प्रालिको अर्को आर्कषण गुलेली पीङ समेत छ । कालीगण्डकी खोंचको स्काइ साइक्लीङ २ सय २८ मिटर अग्लो रहेको प्रालीको भनाई छ । प्रालीमा कार्की सहित अन्य पाँच जनाको लगानी छ ।