आदर्श अनलाइन, बागलुङ
गाउँपालिका राष्ट्रिय महासंघ नेपालले स्थानीय सरकारमा सार्वजनिक वित्त व्यवस्थापन अन्तरगत विषयगत समितिहरुको भूमिका, सिकाई आदान प्रदान र क्षमता अभिवृद्धि कार्यक्रम बिहीवारदेखि म्याग्दीको बेनीमा शुरु गरेको छ ।
२ दिनसम्म सञ्चालन हुने कार्यक्रममा गाउँपालिकाहरुमा गाउसभा र कार्यपालिकाबाट गठित समितिहरुले गरेका उदाहरणीय कामको अनुभव आदान प्रदान गर्नुका साथै समितिहरुको सञ्चालनको अवस्था लगायतका विषयमा छलफल गरिने आयोजकले जनाएका छन् ।
विषयगत समितिहरु कानुनी व्यवस्था अनुसार सञ्चालन भएका छन् कि छैनन, थप सुधारका लागि के गर्न सकिन्छ, कसरी जनतालाई प्रदान गर्ने सेवालाई सहज बनाउन सकिन्छ ? लगायतका विषयमा विषयविज्ञहरुले सहजीकरण गर्ने जनाइएको छ ।
गाउँपालिकामा गठित विषयगत समितिका संयोजक तथा कर्मचारीहरुको सहभागिता रहेको कार्यक्रममा गाउँपालिका महासंघ नेपालका कार्यकारी निर्देशक राजेन्द्र प्याकुरेल र कानुन व्यवसायी प्रेम धितालले सहजीकरण गर्नु भएको छ ।
कार्यक्रममा म्याग्दीका धौलागिरी, मालिका, मंगला र अन्नपूर्ण गाउँपालिका, बागलुङका बरेङ, तमान र ताराखोला गाउँपालिका, पर्वतका महाशिला, मादी र जलजला गाउँपालिका, मुस्ताङका घरपझोङ गाउँपालिकाका विषयगत समितिका संयोजक तथा कर्मचारीहरुको सहभागिता रहेको गाउँपालिका राष्ट्रिय महासंघका केन्द्रीय सदस्य तथा मालिका गाउँपालिका म्याग्दीका उपाध्यक्ष खरमाया बिटालुले जानकारी दिनुभयो ।
कार्यक्रम गाउँपालिका राष्ट्रिय महासंघ गण्डकी प्रदेशका सहसंयोजक तथा महाशिला गाउँपालिका पर्वतका अध्यक्ष राजु प्रसाद पौडेलको अध्यक्षता र महासंघका कार्यक्रम अधिकृत निता राउतको सञ्चालनमा सम्पन्न भएको थियो ।