आदर्श अनलाइन, बागलुङ
सडकको ट्रयाक खुलेको २४ वर्ष पुग्यो । नेपालकै सबैभन्दा लामो खण्ड बागलुङमा रेहेको राष्ट्रिय गौरवको आयोजना मध्यपहाडी पुष्पलाल लोकमार्गको जिल्ला सदरमुकाम खण्ड अझै कालोपत्रे हुन सकेको छैन ।
दूई वर्षमा कालोपत्रे गर्ने काम निर्माण व्यवसायीले छ वर्षमा समेत सकिएको छैन । सडक कालोपत्रे हुँन नसक्दा बिहुँका स्थानीयले निर्माण व्यवसायी विरुद्ध चरणबद्ध आन्दोलन समेत गर्दे आएका छन् । गत असार पछि रोकिएको मध्यपहाडी पुष्पलाल लोकमार्ग अन्र्तगत जिल्ला सदरमुकाम खण्डको २५ किलोमिटरमा पुन काम थालिएको छ ।
गत असोजमा बागलुङ घोडाबाँधे सडक खण्ड अन्र्तगत बिहुँमा दुई किलोमिटर सडक कालोपत्रे गरेर काम छाडेको निर्माण कम्पनीले फागुनबाट काम थालेको छ । अहिले जिल्ला सदरमुकामको खहरे, मुलपानी क्षेत्रमा बेस बिच्छाउने कार्य भइरहेको छ भने उपल्लो खण्डको बिहुँमा कालोपत्रेका लागि ग्राभेल विच्छाउने कार्य भइरहेको मध्यपहाडी पुष्पलाल राजमार्ग आयोजना कार्यालय पर्वतले जनाएको छ ।
पुष्पलाल (मध्यपहाडी) राजमार्ग आयोजना पर्वत कार्यालयका प्रमुख इन्जिनियर नारायणदत्त भण्डारीका अनुसार असारपछि निर्माण व्यवसायिलाई निरन्तरको ताकेता पछि निर्माण कम्पनीले निर्माणलाई तिब्रता दिन थालेको बताउनुभयो ।
“अहिले घोडाँबाधे देखि बागलुङ बजार सम्मको सडकमा कालोपत्रे गर्नु अघिका कामहरु भइरहेको छ, सव बेश विच्छाउने, ग्याविन भर्ने र कल्र्भट बनाउने काम तल्लो खण्डमा भइरहेको छ,” भण्डारीले भन्नुभयो “उपल्लो खण्डमा भने अधिकांश सडक ग्राभेल भइरहेकोछ, निर्माणको काम लगभग सकिएको छ, असार अघि कालोपत्रे सक्ने गरी आयोजना खटिएको छ ।”
मध्यपहाडी पुष्पलाल राजमार्गको बागलुङ बजार उपल्लाचौर–अक्षेते–बिहुँ खण्ड र बिहुँ घोडाबाँधे सडक खण्डको २५ किलोमिटर सडक दुई खण्डमा विभाजन गरेर ठेक्का भएको थियो ।
उपल्लाचौरदेखि अक्षेते–बिहुँ खण्ड २०७३ माघ १४ गते भारत/सिद्धिसाई जेभीले १३ किलोमिटर र बिहुँ घोडाबाँधे खण्ड २०७२ माघ १० गते एमपी/एससिएफ/इसिसी जेभीले १२ किलोमिटर सडक दुई वर्षमा सडक कालोपत्र गर्ने ठेक्का सम्झौता गरेका थिए । तर निर्माण शुरु भएको छ वर्षसम्म कामको ६० प्रतिशतमात्रै सम्पन्न भएको छ ।
बिहुँ खण्डमा चार किलोमिटर सडक एक पटक कालोपत्रे गरिएको, फेरी डकल गर्ने तयारी, छ किलोमिटर सडकमा बेस विच्छाईसकेको २ किलोमिटर सडकमा पूर्वाधारको काम भइरहेको बिहुँ घोडाबाँधे सडकको १२ किलोमिटर सडक निर्माणको जिम्मा पाएको निर्माण व्यवसायीका प्रतिनिधि रामकाजी श्रेष्ठले जानकारी दिनुभयो ।
“शुरुमा कच्चा पदार्थ नै भएन, त्यसपछि कोरोना महामारी, अहिले कालोपत्रे गर्न मौसमले दिएको छैन अन्य पूर्वाधारको काम भइरहेको छ, सके चैत्र सम्म नसके असार सम्म कालोपत्रे गरेरै छोड्छौ” श्रेष्ठले भन्नुभयो “अहिले कामलाई तिब्रता दिइएका छौं, केही परिणाम आउनेगरी क्रसर उद्योग निरन्तर चलिरहेको छ ।”
यस्तै मुलपानी बोक्से सम्म ग्राभेलको काम भइरहेको र खहरेमा बेश विच्छाउने काम भइरहेको छ । चार महिनादेखि ठप्प भएको उपल्लाचौर अझेते सडक खण्डमा अहिले काम भइरहेको सडक निर्माणको जिम्मा पाएको निर्माणको जिम्मा पाएको भारत/सिद्धिसाई कम्पनीले जनाएको छ ।
कुल एक हजार ७७६ किलोमिटर लोकमार्गको बागलुङ खण्डमा मात्रै १४२ किलोमिटर पर्छ । जसमध्ये बागलुङमा २५ किलोमिटरमात्रै सडक कालोपत्र गर्न बाँकी भएको छ ।
बागलुङको लाइफलाइनसंग जोडिएको मध्यपहाडी राजमार्ग जिल्लाको दुर्गम सथान निसीखोला, ढोरपाटन, गलकोट र बडिगाडमा कालोपत्रे भइसकेको छ । तर जिल्ला सदरमुकामसंग जोडिएको लोकमार्गको २५ किमि सडक खण्डकालोपत्रे नहुँदा सरोकारवाला निकायहरुलाई समेत चुनौती बन्दै आइरहेको छ ।