भुँइको टिप्न खोज्दा पोल्टाको पोखिएलाः भरत शर्मा गैरे
आदर्श अनलाइन, बागलुङ
आगामी ३० वैशाखमा हुने स्थानीय तह निर्वाचनका लागि सत्ता साझेदार गठबन्धन दलहरू भागबण्डा मिलाउन कस्सिएका छन् ।
बागलुङमा गठबन्धनलाई संयोजन गरिरहेको नेपाली कांग्रेस, नेकपा (माओवादी केन्द्र), राष्ट्रिय जनमोर्चा र नेकपा (एकीकृत समाजवादी) पार्टी स्थानीय तहमा उम्मेदवारको भागबण्डा मिलाउन पटक–पटक बैठक बस्दै आएको छ तर, हालसम्म भागबण्डामा कुरा मिलेको छैन ।
गठबन्धनका दलले आ–आफ्नै दाबी बैठकमा प्रस्तुत गरिसकेका छन् । दलहरूले आ–आफ्नो दाबी नछोड्दा पालिका तहको प्रमुख उपप्रमुखमा भागबण्डा गर्न सकस भइरहेको हो । गठबन्धन दलबीच औपचारिक अनौपचारिक रूपमा पटक–पटक बैठक छलफल भइरहे पनि कुनै प्रगति हुन नसकेको बताइएको छ ।
बागलुङका १० वटा स्थानीय तह मध्ये २०७४ सालको स्थानीय निर्वाचनमा नेपाली कांग्रेसले निसीखोला गाउँपालिका, तमानखोला गाउँपालिका, गलकोट नगरपालिका र जैमिनी नगरपालिका गरि चार स्थानीय तह, एमालेले ढोरपाटन नगरपालिका, बागलुङ नगरपालिका, काठेखोला गाउँपालिका र बडिगाड गाउँपालिका, नेकपा माओवादी केन्द्रले ताराखोला गाउँपालिका र राष्ट्रिय जनमोर्चाले बरेङ गाउँपालिकाले जितेको थिए ।
यस पटक गठबन्धनका दलहरु विभिन्न स्थानमा आफूलाई गाउँपालिका तथा नगरपालिका प्रमुखको दाबी गर्दै आएका छन् । कांग्रेसले साविक तिजेको पालिकाहरुमा छोड्ने मनाशयमा छैन भने राष्ट्रिय जनमोर्चा र माओवादी केन्द्रले पहिलेको पालिका बढाउने दाउमा देखिन्छन् । नेपाली काँग्रेसका नेता तथा गलकोट नगरपालिकाका मेयर भरत शर्मा गैरेले गठबन्धनका नाममा आफ्नो धरातलीय यथार्थलाइ बिर्सेर आफ्नो सामाथ्र्य भन्दा ज्यादा दाबी गर्ने र गठबन्धनलाई नै आफ्नो गुमेको वा नभएको शक्ति आर्जन गर्ने माध्यम बनाउन कोसिश गर्नुले राम्रो परिणाम नदिने बताउनुभएको छ । उहाँले फेसबुक मार्फत लामो स्टाटस लेख्दै गलकोट नगरपालिकामा विगतको परिणामलाई हेर्दै गठबन्धमा रहेका अन्य दलले समानुपातीक रुपमा प्रमुख उपप्रमुख बाहेकका अन्य पदमा चित्त बुझाउनुपर्ने बताउनुभएको छ । उहाँले गठबन्धको नाममा बढी भुँइको टिप्न खोज्दा पोल्टाको पोखिन सक्ने भन्दै चेतावनी समेत दिनुभएको छ ।
कांग्रेसले पहिले जितेका पालिका नछोड्ने र जनमोर्चा तथा माओवादीले बढाउने दाउ थाप्दा गठबन्धनको बैठकले सार्थकता पाउन नसकेको गठबन्धनका एक नेताले बताउनुभयो ।
कतिपय दलले आफ्नो हैसियतभन्दा बढी पालिका प्रमुखमा दाबी गर्दा सहमति जुटाउन समस्या भएको उहाँको भनाई छ । ति नेताका अनुसार यस अगाडी बरेङ गाउँपालिका जितेको जनमोर्चाले यस पटक जैमिनी नगरपालिकामा पनि प्रमुख मागेको बुझिएको छ ।
त्यस्तै यसभन्दा अगाडी ताराखोला गाउँपालिका मात्रै जितेको माओवादी केन्द्रले अहिले गलकोट नगरपालिका र निसीखोला गाउँपालिकामा पनि दाबी गर्न थालेको पाइएको छ । यी दुबै पालिकामा कांग्रेको राम्रो जनमत हुँदा भागबन्डा नमिलेको नेता कार्यकर्ताको भनाई छ ।
बागलुङमा सबैभन्दा कमजोर रहेको नेकपा एकीकृत समाजवादीले पनि केही पालिका र वडाहरुमा दाबी गरि रहेको पाइएको छ । गठबन्धनकै एक नेताका अनुसार साविक एमालेले जितेको ठाउँमा एकीकृत समाजवादीले दाबी गरे पनि गठबन्धनलाई सहज बनाउनका लागि एक अथवा दुई पालिकामा भए पनि चित्त बुझाउने मनाशयमा रहेको बुझिएको छ ।
अहिलेसम्म सहमति नजुटेको भन्दै ति नेताले आइतबार पनि गठबन्धनको बैठक रहेको बताउनुभयो । उहाँले गठबन्धन जोगाउनका लागि सबै पाटीहरु गम्भीर भएको बताउनुभयो । खासगरी अहिले छलफल जैमिनीमा केन्द्रीत भएको बुझिएको छ । कांग्रेस र जनमोर्चा दुबैले यस पालिकामा आफ्नो नेतृत्व ल्याउने अडान छोडेका छैनन् ।
त्यस्तै गलकोटमा पनि माओवादी र कांग्रेसले आ–आफ्नो दाबी गर्दै आएको पाइएको छ । सहमतिका लागि छलफल निरन्तर भइरहेको ति नेताको भनाई छ । सबै पार्टीको गठबन्धन नटुटोस भन्ने चाहना भएको हुँदा ढिलोचाँडो सहमति जुट्ने उहाँको भनाई छ ।
