आदर्श अनलाइन, बागलुङ
धौलागिरीको पहिलो सञ्चार सहकारी संस्थाका रुपमा स्थापित आदर्श सञ्चार सहकारी संस्था लिमिटेड बागलुङको १६ औं वार्षिक साधारणसभा आगामी मंसिर २० गतेदेखि हुने भएको छ ।
एकाईगत रुपमा ७ दिन र एकाई प्रतिनिधिहरुको सभा एक दिन गरी ८ दिनसम्म सञ्चालन हुने साधारणसभाले संस्थाको गत वर्षको योजना कार्यक्रम र वित्तीय प्रगतिको समग्र समिक्षा र पारितसंगै आगामी योजनाका बारेमा छलफल गरेर संस्थालाई थप प्रभावकारी रुपमा अगाडि बढाइन मार्गनिर्देशन गर्ने संस्थाका अध्यक्ष हुमा कुमारी जि.सी.(अञ्जु) ले जानकारी दिनुभयो ।
संस्थाको असोज १४ गते सम्पन्न सञ्चालक समितिले मंसिर २० गतेदेखि २७ गतेसम्म साधारणसभा गर्ने निर्णय गरेको अध्यक्ष जिसीले बताउनुभयो । कात्तिक २० गते सार्वजनिक सूचना जारी गरी संस्थाले सम्पूर्ण शेयर सदस्यहरुलाई आ–आफ्नो एकाईगत साधारणसभामा सहभागिताका लागि आव्हान गरेको छ ।
३ हजार ३ सय जना शेयर सदस्य रहेको आदर्श सञ्चार सहकारीको एकाईगत साधारणसभा अन्तरगत पहिलो दिन मंसिर २० गते काठेखोला गाउँपालिका वडा नं ७ रेश, दोस्रो एकाई सभा मंसिर २१ गते जैमिनी नगरपालिकाको कुश्मीसेरा बजार र तेस्रो एकाई सभा मंसिर २२ गते बरेङ गाउँपालिकाको हुग्दिशिर घट्टमा सञ्चालन गरिने भएको छ । यस्तै चौथो एकाई सभा मंसिर २३ गते, पाचौ एकाई सभा मंसिर २४ गते, छैठौ एकाईसभा मंसिर २५ र सातौ एकाई सभा मंसिर २६ गते बागलुङ बजारमा सम्पन्न गरिने भएको छ ।
चौथो एकाई सभामा बागलुङ नगरपालिका वडा नंं १ र २, पाचौमा बानपा–३ र ४, छैठौ एकाईसभामा बानपा–५ देखि १४ सम्मका शेयर सदस्यहरुको सहभागिता रहने भएको छ । सातौ एकाईसभामा काठेखोला गाउँपालिका वडा नं. १, २, ३, ४, ५, ६ र ८ तथा गलकोट नगरपालिका, ढोरपाटन नगरपालिका, ताराखोला गाउँपालिका, बडिगाड गाउँपालिका, तमानखोला गाउँपालिका र निसीखोला गाउँपालिकाका शेयर सदस्यहरु सहभागि हुने संस्थाका प्रवन्धक दिपकराज सापकोटाले जानकारी दिनुभयो ।
साधारणसभामा प्रस्तुत हुने नीति तथा कार्यक्रम र आगामी योजनाका बारेमा कार्तिक १९ गते समिक्षा तथा योजना निर्माण गोष्ठी सम्पन्न गरिएको थियो । गोष्ठीमार्फत संस्थाले आगामी दिनमा गर्ने योजना र कार्यक्रम तयार पारिएको छ । १६ औं वार्षिक साधारणसभा सभाले सञ्चालक समिति र लेखा सुपरीवेक्षण समितिको निर्वाचन समेत गर्ने भएको छ ।
सूचना र सञ्चारका क्षेत्रमा आदर्श सञ्चार सहकारी संस्थाले धौलागिरी जागरण दैनिक, अग्रसर साप्ताहिक, आदर्शसञ्चार अनलाइन सञ्चालन गर्नुका साथै धौलागिरी टेलिभिजनमा सहकार्य गर्दै आएको छ ।
वित्तीय कारोबार समेत गर्दै आएको आदर्श सञ्चार सहकारी संस्थामा हाल ३ हजार ३ सय जना शेयर सदस्य, ५ करोड ५२ लाख शेयर रकम, ३० करोड वचत, ३८ करोड ऋण लगानी र ४४ करोड कुल सम्पत्ती रहेको प्रवन्धक सापकोटाले जानकारी दिनुभयो ।
संस्थाले २०७० सालमा निर्माण गरेको १० वर्षे रणनीतिक योजना अन्तरगत आगामी असार मसान्तसम्म ५ हजार भन्दा बढी शेयर सदस्य, ८ करोड शेयर रकम, ४६ करोड वचत, ५१ करोड कर्जा लगानी र ५८ करोड कुल सम्पत्ती बनाउने लक्ष्य लिइएको छ ।
२०७० सालमा बनाएको १० वर्षे रणनीतिक योजना अनुसार आदर्श सञ्चार सहकारीले आफ्ना योजना तथा कार्यक्रम सञ्चालन गर्दै आएको र लक्ष्य प्राप्ती सन्तोषजनक रहेको अध्यक्ष हुमा कुमारी जिसी (अञ्जु) ले बताउनुभयो । आगामी आर्थिक वर्षमा संस्थाले २० वर्षे रणनीतिक योजना बनाएर सवल, सक्षम र प्रभावकारी संस्था निर्माणका लागि काम गर्ने लक्ष्य लिएको अध्यक्ष जिसीले जानकारी दिनुभयो ।
