आदर्श अनलाइन, बागलुङ
त्रिभुवन विश्वविद्यालय अन्र्तगतको आंगिक क्याम्पस धौलागिरी बहुमुखी क्याम्पस बागलुङले बीबीए सातौं सेमेस्टरको परीक्षामा देशमै उत्कृष्ट नतिजा हासिल गरेको छ ।
उक्त परीक्षामा धौलागिरी बहुमुखी क्याम्पसको पहिलो ब्याच सातौं सेमेस्टरमा सहभागी छात्रा प्रतिक्षा गौतमले ४ जिपीए अंक ल्याउँदै त्रिभुवन विश्वविद्यालयमा पहिलो बनेकी हुन् ।
परीक्षामा प्रतिक्षा गौतम नेशनल टपर बनेसँगै धौलागिरी बहुमुखी क्याम्पस देशभरमा नै उत्कृष्ट र प्रदेशमा प्रथम बन्न सफल भएको क्याम्पस प्रमुख रामप्रसाद उपाध्यायले बताउनुभयो ।
क्याम्पसको तर्फबाट परीक्षामा सहभागीमध्ये ८० प्रतिशत विद्यार्थीको ३.९ जिपीए भन्दा माथि अंक आएको प्राध्यापक जोन बज्राचार्यले बताउनुभयो । धौलागिरी बहुमुखी क्याम्पसले बीबीए कक्षा सुरुवात गर्दा देखिनै उत्कृष्ट नतिजा ल्याउँदै देशमै अब्बल भएको छ ।
धौलागिरी बहुमुखी क्याम्पसबाट परीक्षामा सहभागी २८ जना विद्यार्थी उत्कृष्ट नजिता सहित परीक्षामा उत्तीर्ण भएका छन् ।
अहिले धौलागिरी बहुमुखी क्याम्पसले बीबीए कार्यक्रमलाई पहिलो प्राथमिकताको रुपमा लिएको प्राध्यापक विप्लव शर्माले जानकारी दिनुभयो । बीबीए अन्र्तगत धौलागिरी बहुमुखी क्याम्पसमा ४ ब्याचका विद्यार्थी अध्ययन गरिरहेका छन् । हाल बीबीएमा कुल १५२ जना विद्यार्थी अध्यनरत रहेको प्राध्यापक बज्राचार्यले जानकारी दिनुभयो ।