आदर्श अनलाइन, बागलुङ
बागलुङको ताराखोला गाउँपालिकाले सरुवा भएर आउनु भएका प्रमुख प्रशासकीय अधिकृतलाई हाजिर नगराई फिर्ता पठाएको छ । सामान्य प्रशासन मन्त्रालयबाट सरुवा भएर आउनु भएका प्रमुख प्रशासकीय अधिकृत डिलाराम पाण्डेलाई गाउँपालिकाले फिर्ता गरेको हो ।
पाण्डेलाई भदौ ४ गते मन्त्रालयले ताराखोलामा सरुवा गरेको गरेको थियो । भदौ २६ गते हाजिर हुन ताराखोला आउनु भएका पाण्डेलाई गाउँपालिकाका अध्यक्ष धनबहादुर विकले हाजिर नगराई फिर्ता पठाउनु भएको हो । नयाँ हाकिमलाई किन हाजिर नगराई फिर्ता पठाउनु भयो ? भन्ने आदर्श सञ्चारको प्रश्नमा अध्यक्ष विकले सबैलाई किन भन्नु प¥यो भन्दै फोन काट्नु भयो ।
गैरजिम्मेवार जवाफ दिने अध्यक्ष विकले अन्य कुरा गर्नै मान्नु भएन । गाउँपालिकाले अघिल्लो वर्षको असार महिनादेखि प्रकाश गैरेलाई निमित्त प्रमुख प्रशासकीय अधिकृतका रुपमा जिम्मेवार दिँदै आएको छ । मन्त्रालयबाट सरुवा भएर आउनु भएका प्रमुख प्रशासकीय अधिकृत पाण्डेले गाउँपालिकाले हाजिर नगराएपछि अहिले काठमाडौँ फर्किएको बताउनुभयो ।
अधिकृत पाण्डेले भन्नुभयो – “मन्त्रालयले भदौ ४ गते ताराखोला सरुवा गरेको थियो, म २६ गते हाजिर हुन गाउँपालिका गएको थिए, हाजिर हुन नदिएपछि काठमाडौँ फर्किएको छु, अब यतै मन्त्रालय तिर हुन्छ होला ।”