आदर्श अनलाइन, बागलुङ
बागलुङको बडिगाड गाउँपालिका वडा नं ७ स्थित भिमगिठे प्रहरी चौकी इन्चार्ज प्रहरी वरिष्ठ नायव निरिक्षक उज्जल पौडेलको हत्यामा संलग्न रहेको आरोपमा प्रहरीले थप एक जनालाइ पक्राउ गरेको छ ।
गत श्रावण ८ गते स्थानीय आशा होटल एण्ड खाजा घरमा होटल भित्रै मृत भेटिएका पौडेलको हत्यामा संलग्न रहेको भन्दै प्रहरीले यसअगाडी नै होटल सञ्चालिका आशा कुँवर र उनका छोरा बिनोद कुँवरलाई पक्राउ गरेको थियो ।
अनुसन्धानका क्रममा बडिगाड गाउँपालिका वडा नं ६ का १९ वर्षीय विशाल सुनुवारको पनि घटनामा संलग्नता रहेको खुल्न आएकाले शुक्रबार पक्राउ गरी जिल्ला अदालत बागलुङबाट म्याद थप भई थप अनुसन्धान थालिएको जिल्ला प्रहरी कार्यालय बागलुङका सुचना अधिकारी प्रहरी नायव उपरीक्षक मदन केसीले जानकारी दिनुभयो ।
होटलमा मृत फेला परेका पौडेलको हत्या भएको प्रारम्भिक अनुसन्धानपछि प्रहरीले होटल सञ्चालक कुँवर र उनका छोरालाई सोही दिन पक्राउ गरेको थियो । प्रहरी अनुसन्धानबाट इन्चार्ज पौडेल आशा होटल एन्ड खाजाघरमा जानुभएको र विवादका क्रममा आमाछोरा मिलेर पौडेललाई गम्भीर तरिकाले कुटपिट गरी सलले पासो लगाएर हत्या गरेको प्रहरीले अनुसन्धानका क्रममा पत्ता लगाएको उहाँले बताउनुभयो ।
