आदर्श अनलाइन, म्याग्दी
मुस्ताङको थाकखोला क्षेत्र उद्गम स्थल भएका थकाली समुदायले मुख्य पहिचान थकाली भाषा, संस्कृति तथा संस्कार एवम् सभ्यता लोप हुने चिन्ता व्यक्त गरेका छन् । म्याग्दीको सदरमुकाम बेनीमा आयोजि एक कार्यक्रममा थकाली समुदायका अगुवाहरुले चिन्ता व्यक्त गरेका छन् ।
आधुनिकताले थकाली भाषा बोल्नेको संख्या घट्दै गएको बुढापाकाले चिन्ता व्यक्त गरेका थिए । थकाली सेवा समाज नेपाल र थकाली अनुसन्धान केन्द्रको मुख्य आयोजनामा सुरू भएको १५ दिने थकाली जातिको खिमीच्हुव तथा तोरन्ल क्होई प्रशिक्षण कार्यक्रमको उद्घाटन गदैं गण्डकी प्रदेश सभा सदस्य बिमला गौचनले परम्परा, रीतिरीवाज, धर्म, संस्कृति, भाषा र विविधता जोगाउन तर्फ अब पनि ध्यान नदिने हो भने पछि भाषा संस्कृतिको बारेमा जानकारी नै नहुन सक्ने बताउनुभयो ।
उहाँले भन्नुभयो–‘अहिलेसम्म आइपुग्दा नै अवस्था जटिलता तर्फ पुगी सकेकोले बेलैमा ध्यान दिन सकिएन भने पछि संरक्षण गर्नु नै कठीन हुने छ, ‘थकाली जातिले जन्मदेखि मृत्युसम्मका परम्परागत संस्कृतिको जर्गेनामा युवापुस्ताको सक्रियता र नेतृत्व आवश्यक छ ।’
कार्यक्रममा पूर्वराज्यमन्त्री भिमप्रसाद गौचनले हरेक थकालीले आफ्ना धर्म, संस्कृति, भाषालाई अनिवार्य प्रयोगमा ल्याउनु पर्नेमा जोड दिनुभयो । थकाली जातिको पहिचान र संस्कार अन्यको तुलानामा फरक रहेको हुँदा संरक्षणमा युवा पुस्ताले चासो देखाउनु पर्ने बताउनुभयो ।
प्रशिक्षण कार्यक्रममा थकाली अनुसन्धान केन्द्रका उपाध्यक्ष एवम् तालिमका प्रशिक्षक गोेन्द्रमान भट्टचन, अध्यक्ष नरेश कुमार तुलाचनले थकाली समुदायको उत्थान र विकासमा भाषा र संस्कृतिको संरक्षण गर्न थकाली समुदाय एकताबद्ध हुनुपर्नेमा जोड दिनुभयो ।
प्रशिक्षण कार्यक्रम थकाली सेवा समाज नेपालका अध्यक्ष गजेन्द्र तुलाचनको अध्यक्षता, केन्द्रीय सदस्य शंकर शेरचनको स्वागात, थकाली अनुसन्धान केन्द्रकी सचिव शुसिला शेरचनको सञ्चालनमा सम्पन्न भएको थियो ।
तालिमको अवसरमा अनुसन्धान केन्द्रबाट प्रकाशित थकाली जातिको खिमीच्हुव तथा तोरन्ल क्होई पुस्तक समेत विमोचन गरिएको थियो ।