आदर्श अनलाइन, बागलुङ
बागलुङ नगरपालिका–१३ पैयुँपाटा बडहरेक मिलन ढकालले आफ्ना वृद्ध बाबा आमालाई खानेपानीबाट वञ्चित गरिएको भन्दै राष्ट्रिय मानव अधिकार आयोगमा उजुरी दिनु भएको छ ।
आफ्ना ६७ वर्षिय बा र आमालाई जनप्रतिनिधिकै उक्साहाटमा पानीको धारासम्म पुग्ने बाटोमा बार लगाएर पिउने पानीबाट बञ्चित गरेको भन्दै को भन्दै ढकालले ०८० फागुन १७ गते राष्ट्रिय मानव अधिकार आयोग काठमाडौंमा उजुरी दिनु भएको हो ।
ढकालले बागलुङ नगरपालिका–१३ का वडा अध्यक्ष नारायण शर्मा पौडेल, स्थानीय नारायण ढकाल र सनम ढकाल लगाएको नाममा आयोगमा उजुरी दिनु भएको हो ।
पैयुँपाटा बडहरेका ६७ वर्षीय गंगा ढकाल पाध्यले २०७२ सालबाट पिउदै आएको पानीको धारामा पुग्न स्थानीयको नीजि जमिनको बाटो प्रयोग गर्नुपर्ने बाध्यता रहेकोमा ०७९ चैत महिनाबाट उक्त बाटोमा बार लगाईएको छ ।
पानी लिन जाने बाटोमै बार लगाएपछि ढकाल दम्पत्तीले हारगुहार गर्दै आउनु भएको थियो ।
वडा अध्यक्ष नारायण शर्मा पौडेलले समस्या समाधानका लागि पटक पटक पहल गरिएको भएपनि सफल नभएको बताउँदै न्यायीक समितिमा उजुरी परेकाले पुनः छलफलको तयारी गरिएको बताउनु भयो ।
गंगा ढकालले आफ्नो खेतमा जाने बाटोमा बार लगाएकाले आफुहरु बाध्य भएर गंगाले पानी ल्याउन प्रयोग गर्ने बाटोमा बार लगाएको स्थानीय नारायण ढकालले बताउनु भयो ।
तर, गंगाले भने आफ्नो घर वा गोठको छेउबाट बाटो दिन तयार रहँदा रहँदै पनि स्थानीयहरु घर आगनको बिचबाटै बाटो चाहिन्छ भनेर आफुमाथी अन्याय गरिरहेको बताउनु हुन्छ ।
जनप्रतिनिधिको निर्देशनमा पानी ल्याउन प्रयोग गर्दै आएको बाटोमा बार लगाईएको भन्दै बिहीबार आयोगमा निवेदन आएको राष्ट्रिय मानव अधिकार आयोगका प्रवक्ता डा.टिकाराम पोखरेलले जानकारी दिनु भयो । आयोगले प्रदेश कार्यालय पोखरामा उजुरी पठाउने र थप अध्ययन पोखरा कार्यालयबाट हुने पोखरेलले बताउनु भयो ।