आदर्श अनलाइन, बागलुङ
बागलुङ जिल्लाको बडिगाड गाउँपालिकामा सुन चोरी गर्नेलाई प्रहरीले पक्राउ गर्न सफल भएको छ ।
बडिगाड गाउँपालिका–२ खर्बाङ स्थित नरमाया थापाको घरबाट गत शनिबार साँझ १ थान सुनको सिक्री, २ थान तिलहरी १ थान सुनको औंठी, १ थान छापे औंठी, १ थान बाला र नगद ५०० चोरी गर्ने २१ वर्षिय किरण विकलाई प्रहरीले पक्राउ गरी आज सार्वजनिक गरेको छ ।
विक म्याग्दी जिल्लाको मालिका गाउँपालिका–३ निवासी हुन् । सुन चोरी भएको सूचना पाएलगत्तै इलाका प्रहरी कार्यालय बुर्तिवाङ, गलकोट र प्रहरी चौकी खर्बाङको टोलीले विकलाई खर्बाङस्थित मध्यपहाडी लोकमार्गबाट गहनासहित पक्राउ गरेको जिल्ला प्रहरी कार्यालय बागलुङका प्रहरी प्रमुख प्रहरी उपरिक्षक ऋषिराम कँडेलले जानकारी दिनुभयो ।
पक्राउ परेका विकलाई मुलुकी अपराध संहिता २०७४ को परिच्छेद २० अन्तर्गत चोरी सम्बन्धी कसुरमा मुद्दा चलाउन अनुसन्धानका लागि जिल्ला अदालत बागलुङबाट ५ दिनको म्याद थपिएको कँडेलले बताउनुभयो ।
