आदर्श अनलाइन, बागलुङ
नागरिकको बचत रकम अपचलन गरेर फरार रहेका ढोरपाटन नगरपालिकाका नगरप्रमुख तथा इमेज बचत तथा ऋण सहकारीका अध्यक्ष देव कुमार नेपालीलाई पक्राउ गरी बागलुङ ल्याईएको छ ।
केन्द्रिय अनुसन्धान व्यूरोले शनिबार भारतबाट पक्राउ गरी नेपाल ल्याएको थियो । नेपालीलाई काठमाडौं बाट प्लेन हुँदै पोखरा ल्याईएको र पोखरा पुगेर जिल्ला प्रहरी कार्यालय बागलुङले नेपालीलाई बागलुङ ल्याएको जिल्ला प्रहरी कार्यालय बागलुङका सुचना अधिकारी सुनिल शर्मा चिलवालले जानकारी दिनुभयो ।
चिलवालका अनुसार उहाँलाई सोमबार कानून अनुसार जिल्ला अदालत बागलुङ पेश गरिने छ ।
नेपालाीलाई खोज्न गत माघमा ‘रेड कर्नर नोटिस’ जारी भएको थियो ।
नेपाल प्रहरीले भारतस्थित नेपाली दूतावासमार्फत समन्वय गरेर उनलाई नेपाल ल्याइएको थियो ।
सहकारी ठगीमा अध्यक्ष नेपालीसहित सञ्चालकविरुद्ध कास्कीका ५२४ र बागलुङका एक हजार ५४३ बचतकर्ताले गत वर्ष जेठमै उजुरी दिएका थिए । देव कुमार बागलुङ आएसंगै बचत कर्ताले रकम फिर्ता पाउनेमा आश पलाएको छ । नगरप्रमुख नेपालीले बागलुङ र पोखरा गरी दुई अर्ब बचत रकम अपचलन गरेको बचत कर्ताको आरोप छ ।