आदर्श अनलाइन, बागलुङ
प्रेस चौतारी नेपाल जिल्ला शाखा बागलुङले स्थापना दिवस विविध कार्यक्रम गरेर मनाएको छ ।
२०६१ साल मंसिर १६ गते स्थापना भएको बागलुङ शाखाले २१ औँ वर्ष प्रवेश गरेको अवसरमा ‘विद्यार्थीसँग प्रेस चौतारी’ कार्यक्रमको शुभारम्भ गर्नुका साथै २ वटा कोष समेत स्थापना गरेको छ ।
प्रेस चौतारी नेपालको स्थापना दिवसको अवसरमा २०८० माघ १९ देखि २२ गतेसम्म सञ्चालन गरेको ‘प्रेस चौतारी कप–२०८०’ अन्तर विद्यालय स्तरीय फुटबल प्रतियोगिताबाट खर्च कटाएर ७५/७५ हजार राशिका २ वटा कोष स्थापना गरेको अध्यक्ष सिर्जना पन्तले जानकारी दिनुभयो ।
प्रेस चौतारी कप–२०८० को विजेता विद्यालय चिल्ड्रेन लाइफ इङ्लिस बोर्डिङ स्कुलबाट ‘विद्यार्थीसँग प्रेस चौतारी’ कार्यक्रमको शुभारम्भ गर्दै नेकपा एमाले बागलुङका अध्यक्ष हिराबहादुर केसीले सूचना र सञ्चारको सदुपयोग गरेर विद्यार्थीले आफ्नो जीवनको मार्ग कोर्नुपर्ने बताउनु भएको थियो ।
विश्वमा धनी, शक्तिशाली व्यक्ति र राष्ट्रहरु सूचना र सञ्चारको सही प्रयोगबाटै बनेको भन्दै उहाँले यसको गलत प्रयोगले व्यक्तिमात्र नभएर सिंगो व्यवस्थानै तहसनहस हुन सक्ने बताउनु भएको थियो ।
पछिल्लो समय युवा, विद्यार्थी र सचेत नागरिक समेत भ्रामक सूचनाको सिकार हुँदा समाज र व्यवस्था समेत अराजकताको भूमरीमा फस्न सक्ने सम्भावना बढेको भन्दै उहाँले सबैको भविश्य अन्योलमा पर्ने खतरा बढेको बताउनु भयो ।
कार्यक्रममा प्रेस चौतारी नेपालका केन्द्रिय सदस्य तथा जिल्ला इन्चार्ज तारानाथ आचार्य, प्रेस चौतारी नेपालका पूर्व सचिव तथा बागलुङका संस्थापक तथा रामकृष्ण शर्मा, चिल्ड्रेन लाइफ इङ्लिस बोर्डिङ स्कुलका प्रिन्सिपल नवराज श्रेष्ठ र पत्रकार महासंघ बागलुङका सचिव विजय रानाले शुभकामना मन्तव्य व्यक्त गर्नु भएको थियो ।
सो अवसरमा कक्षा ११ र १२ मा अध्यनरत व्यवस्थापन संकायका १ सय ५० जना विद्यार्थीलाई प्रेस चौतारी नेपालका केन्द्रिय सदस्य तथा जिल्ला इन्चार्ज तारानाथ आचार्यले बोल्ने कला सम्बन्धी प्रशिक्षण दिनु भएको थियो ।
त्यसैगरी चौतारीले पत्रकार सम्मेलनको आयोजना गरेर ‘प्रेस चौतारी संस्थागत विकास कोष’ र ‘प्रेस चौतारी कप कोष’को घोषणा गरेको छ ।
२० औँ स्थापना दिवसबाट प्रत्येक महिना एउटा विद्यालयका विद्यार्थीसँग पुग्ने गरि ‘विद्यार्थीसँग प्रेस चौतारी’ कार्यक्रम र कोष स्थापना गरिएको जानकारी सहित शुभकामना आदान प्रदान गर्ने उद्देश्यले पत्रकार सम्मेलनको आयोजना गरेको सचिव अर्जुन कार्कीले बताउनु भयो । जिल्ला अध्यक्ष सिर्जना पन्तको अध्यक्षतामा भएको कार्यक्रम उपाध्यक्ष खेमराज गौतमको धन्यवाद मन्तव्य तथा सचिव अर्जुन कार्कीको सञ्चालनमा सम्पन्न भएको थियो ।
स्थापना दिवसका अवसरमा ‘विद्यार्थीसँग प्रेस चौतारी’ कार्यक्रम सहित २ वटा कोष स्थापना
