डम्मर बुढाम गर, बागलुङ
बागलुङको ढोरपाटन नगरपालिका–१ बुर्तिबाङ भब्रेटामा सिटी हल निर्माण गर्न थालिएको छ । नयाँ सहर आयोजना कार्यालय बुर्तिबाङले रु एक करोड २८ लाख लागतमा सिटी हल निर्माण गर्न थालेको हो । सरकारले नेपालका दश नमुना सहर मध्येमा छनोट गरेको बुर्तिबाङ बजारमा अहिलेसम्म सिटी हल बन्न सकेको थिएन ।
नयाँ सहर आयोजनाले गत वर्षदेखि भब्रेटामा हल बनाउन थालेको हो । निर्माण कम्पानीले ढिला सुस्ती गर्दा कामले गति लिन नसकेको नयाँ सहर आयोजना बुर्तिबाङका प्रमुख रामकृष्ण गिरीले जानकारी दिनुभयो । वि.सं. २०८० फागुन १ गते सम्झौता गरि काम सुरु गरे पनि हालसम्म ३५ प्रतिशत मात्रै काम सकिएको उहाँको भनाइ छ ।
निर्माणको जिम्मा पाएको ढोरपाटन निर्माण सेवाले यही माघ ३० गते सम्पन्न गर्ने गरि सम्झौता गरेको प्रमुख गिरी बताउनुहुन्छ । सम्झौता अवधिमै काम सक्ने संभावना कम रहेको भन्दै निर्माण कम्पनीलाई काम गर्न आग्रह गरि रहेको उहाँको भनाइ छ ।
प्रमुख गिरीले भन्नुभयो – “सिटी हल बनाउन सुरु गरेको गत वर्षदेखि नै हो, यति बेला बनिसक्नु पर्ने हो तर निर्माण कम्पनीको ढिला सुस्तीका कारण कामले पूर्णता पाउन सकेको छैन, काम समयमै सक्नका लागि निर्माण कम्पनीलाई बारम्बार पत्र काट्यौँ तर सुनुवाई भएन, अहिले काममा फर्किने संकेत देखाएको छ, धमाधम ग¥यो भने केही मनिामा काम सकिने अपेक्षा लिएका छौँ ।”
बुर्तिबाङ बजार साँघुरो हुँदा सिटी हलसहित पार्क, कार्यालय भवन अन्य ठाउँमा बनाउनु परेको छ । नयाँ सहर आयोजनाले ढोरपाटन नगरपालिका–१ र २ का विभिन्न स्थानमा संरचना बनाउँदै आएको छ ।
