डम्मर बुढा मगर, बागलुङ
राष्ट्रिय गौरवको आयोजना मध्यपहाडी लोकमार्गले बागलुङका दूर दराजका बस्ती छिचोल्दै पूर्वी रुकुम जोडिएको छ । पाँचथरको चियोभञ्ज्याङदेखि बैतडीको झुलाघाटसम्म एक हजार ८७९ किलोमिटरमा फैलिएको लोकमार्ग बागलुङ जिल्लामा १३५ किलोमिटर पर्छ । वि.सं. २०६४ सालदेखि सुरु भएको आयोजनाको बागलुङ खण्डमा ९० प्रतिशत काम सकिएको छ ।
लोकमार्गको सदरमुकाम खण्ड विभिन्न संस्थाहरुले साढे दुई दशक अगाडिनै सडक खुलेका थिए भने । पश्चिम बागलुङ खण्डमा २०६४/०६५ तिर मात्रै ट्रयाक खोलिएको थियो । आयोजना सुरु भएको १७ वर्ष बितिसक्दा आयोजना सम्पन्न नहुँदा लोकमार्ग छेउछाउका बस्तीमा हिलो र धुलोले हैरानी बनाएको छ । मध्यपहाडी लोकमार्ग कार्यालय पर्वतका अनुसार अब १० प्रतिशत मात्रै काम बाँकी छ ।
लोकमार्ग कार्यालय पर्वतका सूचना अधिकारी किरण सुवेदीले अब १३ किलोमिटर सडक कालोपत्र गर्न बाँकी रहेको जानकारी दिनुभयो । हालसम्म १२२ किलोमिटर सडक कालोपत्र भएको उहाँको भनाइ छ । लोकमार्ग कार्यालयले विभिन्न खण्डमा काम गरि रहेको भन्दै निसीखोला गाउँपालिका अन्तरगतको १५ किलोमिटर सडक काम सकेर सडक विभागलाई हस्तान्तरण गरि सकेको उहाँले बताउनुभयो ।
उहाँका अनुसार बागलुङ बजारदेखि वयलडाँडासम्मको पाँच किलोमिटर र बयलडाँडादेखि घोडाबाँधेसम्मको आठ किलोमिटर बाहेक सबै खण्ड कालोपत्र भइसकेको छ । पाँच किलोमिटर यसै वर्ष सम्पन्न हुने र बाँकी आठ किलोमिटर अर्को वर्षमा सक्ने गरि काम भइरहेको सूचना अधिकारी सुवेदी बताउनुहुन्छ ।
उहाँले भन्नुभयो – “बागलुङ खण्डमा पर्ने धेरै ठाउँमा सडक कालोपत्र भएर पुनः मर्मत पनि भईसकेका छन्, काम सकिएका खण्डको फरफारक र सडक विभागलाई हस्तान्तरण गर्न बाँकी छ, अब करिब–करिब काम सकिने गतिमा छन्, बिहुँ खण्डमा ठेक्का तोडेर पुनः लगाउँदा ढिला भएको हो, अबको एक वर्षमा सबै काम सकिने छ, काम सकिएपछि सबै खण्ड सडक विभागलाई हस्तान्तरण गर्ने छौँ ।”
मध्यपहाडी लोकमार्गले नजोडिँदा बागलुङको सबैभन्दा विकट मानिने निसोखोला अहिले सुगम बनेको छ । निसीखोलावासीका लागि लोकमार्ग वरदान सावित भएको गाउँपालिका निसीखोला गाउँपालिकाका अध्यक्ष सूर्यबहादुर घर्ती मगरले बताउनुभयो । यो लोकमार्गले सिधै प्रदेश राजधानी पोखरा र संघीय राजधानी काठमाडौँसँग जोडेको उहाँको भनाइ छ ।
“विगतमा निसीखोला विकट हुँदा काम गर्ने कर्मचारी पनि आउँन मान्दैनथे, यहाँका नागरिकले हप्ता दिन लगाएर जिल्ला सदरमुकाम पुग्नु पर्ने बाध्यता थियो, तर अहिले एकै दिनमा सदरमुकाम होइन राजधानीनै पुग्न सकिन्छ” अध्यक्ष घर्ती मगरले भन्नुभयो – “सहज सडकको पहुँले यहाँको उत्पादन बजारीकरण गर्न र यात्रा गर्न टेवा पु¥याएको छ भने यस क्षेत्रका हजारौँ नागरिकको जीवनस्तर पनि परिवर्तन गरि एिको छ ।”
मध्यपहाडी लोकमार्ग अन्तरगत बागलुङ खण्ड भएर पश्चिम नेपालको पूर्वी रुकुम, पश्चिम रुकुम, जाजरकोट, डोल्पा लगायतका जिल्लादेखि दैनिक दर्जनौँ रात्री तथा दिवा बसहरु संघीय राजधानी काठमाडौँका लागि चल्ने गर्छन् ।”