आदर्श सञ्चार, बागलुङ
बागलुङमा ६८ औं राष्ट्रिय सहकारी दिवस भव्य रुपमा मनाइएको छ । जिल्ला सहकारी संघ लिमिटेड बागलुङ र बागलुङ नगरपालिकाको संयुक्त आयोजनामा प्रभातफेरी सहित कोणसभा गरी ६८ औं राष्ट्रिय सहकारी दिवस भव्यरुपमा मनाइएको हो ।
बागलुङ बजारको समिक्षालय चोकदेखि शुरु भएको सचेतनामुलक प्लेकार्ड, सहकारी सम्बन्धी भजन किर्तन सहित पेन्सनक्याम्प, देउरालीचोक, जिपपार्क हुँदै लोकतान्त्रिक चोकमा पुगेर कोण सभामा परिणत भएको थियो ।
कोणसभामा बोल्दै प्रमुख अतिथि बागलुङ नगरपालिकाका प्रमुख बसन्त कुमार श्रेष्ठले सहकारीमार्फत देशको अर्थतनत्र बलियो बन्दै गएको बताउनुभयो । पछिल्लो समय केही सहकारीले गरेको बदमासीका कारण आम सहकारीप्रति नकरात्मक हल्ला फैलिएको छ, नगर प्रमुख श्रेष्ठले भन्नुभयो,–‘हल्लाको पछि लागेर सहकारीलाई बद्नाम गराउन हुदैन, ग्रामिण क्षेत्रको, पछि परेका जनताको आर्थिक विकासको आधार सहकारी हो ।’ उहाँले एक/दुई सहकारी बद्नाम हुँदैमा सिंगो सहकारी आन्दोलनलाई असर पार्न नहुँने बताउनुभयो ।
“सहकारीका कारण आर्थिक विकास, रोजगारी सृजना लगायतका काम भएको, आज सहकारी अभियानले बागलुङ बजार जुरुक्क उठेको छ, एउटा सहकारीमा समस्या आयो भन्दैमा सबैलाई एउटै डालोमा राख्न भएन, नियमपूर्वक चलेका सहकारीलाई स्थानीय सरकारले प्रोत्साहन गर्नेछ” श्रेष्ठले भन्नुभयो “सहकारी मार्फत समाज रुपान्तरण आजको आवश्यकता हो, हल्लाको भरमा पछि लाग्न हुँदैन सहकारी आन्दोलन अघि बढ्छ ।”
सहकारीप्रतिको निराशालाई चिर्दै समुदायमा सहकारीको थप योगदान बढाउनका लागि स्थानीय तह र सहकारी अभियानबीच सहकार्य आवश्यक रहेको नगर प्रमुख श्रेष्ठको भनाइ थियो । कार्यक्रममा नेपाल सूचना तथा सञ्चार केन्द्रिय सहकारी संघका अध्यक्ष मन कुमारी केसीले सहकारीको माया नभएका, सहकारीमार्फत व्यक्तिगत सम्पत्ती आर्जन गर्न खोज्ने प्रवृति भएका केही व्यक्तिका कारण सिंगो सहकारी अभियानलाई आरोपित गर्न नहुने बताउनुभयो । सहकारीले समाज रुपान्तरणमा धेरै नै योगदान गरेका छन्, सहकारीको नाममा गलत गर्नेहरुका कारण सबै सहकारी प्रताडित हुने अवस्थाको अन्त्यका लागि सबैले सकारात्मक सोच र समन्वय गरेर अगाडि बढ्नु पर्नेमा उहाले जोड दिनुभयो ।
कार्यक्रम जिल्ला सहकारी संघ बागलुङका अध्यक्ष हुमा कुमारी जिसी (अञ्जु) को अध्यक्षता, बागलुङ नगरपालिकाका उपप्रमुख राजु खड्काको स्वागत र संघका सचिव तेज प्रसाद शर्माको सञ्चालनमा सम्पन्न भएको थियो । ६८ औं राष्ट्रिय सहकारी दिवसका अवसरमा जिल्ला सहकारी संघ लिमिटेड बागलुङले जिल्लाका १० वटै पालिकाहरुमा स्थलगत रुपमा पुगेर सहकारीको प्रवद्र्धनमा स्थानीय तहको भूमिका बढाउन, सहकारी शिक्षा लगायत सहकारीमार्फत सदस्यको आर्थिक विकास हुने गतिविधि सञ्चालन गर्न तथा राष्ट्रिय सहकारी दिवस मनाउन आग्रह गरेको संघका अध्यक्ष जिसीले जानकारी दिनुभयो ।
सबै पालिका तथा सहकारी संघ संस्थाहरुले समेत सहकारी दिवसका अवसरमा आ–आफ्नो अनुकुलता अनुसार सहकारी दिवसका कार्यक्रम गरेको उहाँले जानकारी दिनुभयो ।