मन कुमारी केसी, बागलुङ
धौलागिरी प्रादेशिक अस्पताल बागलुङमा ग्रामीण अल्ट्रासाउन्ड तालीम सुरु भएको छ । गण्डकी प्रदेश स्वास्थ्य मन्त्रालयले प्रदेशमै पहिलो पटक धौलागिरी अस्पतालबाट तालिमको शुभारम्भ गरेको हो ।
गण्डकी प्रदेशका ११ जिल्ला मध्ये पहिलो चरणमा ६ जिल्लाका ६ वटा पालिका बाट स्थानीय स्वास्थ्य संस्थाका नर्सिङ स्टाफहरुलाई सहभागी बनाएर तालिम दिन लागिएको हो ।
शुक्रबार गण्डकी प्रदेशका स्वास्थ्य मन्त्री कृष्ण पाठकले तालिमको शुभारम्भ गर्नु भएको छ । तालिमको शुभारम्भ गर्दै मन्त्री पाठकले प्रदेशमा मातृ मृत्युदर न्यूनिकरण गर्न र गर्भवती आमाको स्वास्थ्यमा सुधार ल्याउन तालिम फलदायी हुने बताउनु भयो । उहाँले देशभर वर्षनी एकलाख गर्भवती आमामध्ये १ सय ५१ आमाको अकालमा ज्यान जाने गरेको र गण्डकी प्रदेशमा वर्षनी १ सय ६१ आमाको ज्यान गाने गरेको हुँदा गाउँघरकै स्वास्थ्य संस्थाहरुका स्वास्थ्य कर्मीहरुलाई तालिम दिएर मृत्युदर कम गर्न उद्देश्यले तालिमको सुरु गरिएको बताउनु भयो ।
उहाँले आफु मन्त्री भएको दिनदेखिनै जनताको आधारभुतस् वास्थ्यलाई ख्याल गरेर विभिन्न तालिमहरुको साथै सर्ने र नसर्ने रोगहरुको समुदायमै स्कृनिङ गर्न थालेको बताउनु भयो । केही दिन पहिले मात्र प्रदेशमै पहिलो पटक पोखराको जनरल तथा सरुवारोग अस्पतालमा हेमोडायलासिस तालिम सुरु गरिएको छ । यी दुबै तालीमलाई मन्त्रालयले आगामी आर्थिक बर्षको बजेटमा व्यवस्था गरेर निरन्तरता दिने समेत मन्त्री पाठकले बताउनु भयो ।
मन्त्री पाठकले धौलागिरी प्रादेशिक अस्पतालमा निकट भविष्यमा संचालनमा ल्याउन लागिएको जलन युनिटको समेत पाठकले निरीक्षण गर्नु भएको थियो । मन्त्री पाठकले छिटैनै प्रादेशिक अस्पतालहरु क्रमश बागलुङ, गोर्खा, लम्जुङ, तनहुँ र मध्यबिन्दुमा जलन युनिटहरु स्थापना गरिने समेत जानकारी दिनुभयो ।
आफ्नो कार्यकालमा गण्डकी प्रदेशको स्वास्थ्य क्षेत्रलाई अब्बल बनाउने गरी काम गरिरहेको उहाँको भनाई थियो ।
