आदर्श अनलाइन, काठेखोला
बागलुङ जिल्लाको काठेखोला गाउँपालिका वडा नम्बर ३ धम्जाले वडाका सबै नाकामा कडाई गर्न थालेको छ ।
वडा अध्यक्ष यामबहादुर श्रीसको अध्यक्षतामा मंगलबार बसेको बैठकले वडाका म्याग्दी जोड्ने बेलढुंगा नाका, ताराखोला गाउँपालिका जोड्न धम्जा देउराली नाका, गाउँपालिकाकै वडा नम्बर ४ तंग्राम जोड्न रामचालु नाका र हिल नाका, वडा नम्बर २ भीमापोखरा जोड्न माझकटेरा र द्धार नाकामा बिशेष कडाई गर्ने निर्णय गरेको छ ।
यसका लागि प्रत्येक नाकामा स्वयम्सेवक समिति गठन गरेर परिचालन गरिने वडा सदस्य खुमबहादुर भण्डारीले आदर्श अनलाइनलाई जानकारी दिए । बैठकले लकडाउनका अवधिमा सवारी चलाउने, गाउँमा जुवातास खेल्ने जस्ता अवाञ्छित गतिविधि समेत भएको गुनासो आएकाले तत्काल रोक्न र अटेर गर्नेलाई प्रहरी प्रशासनको सहयोगमा कानुनी दायरामा ल्याउने निर्णय गरिएको उनले बताए ।
अब अन्य वडाहरुबाट कुनै व्यक्तिको प्रवेश भएमा अनिवार्य रुपमा १४ दिन वडाले तयार गरेको क्वारेन्टिनमा राख्ने समेत निर्णय गरिएको अध्यक्ष याम श्रीसले जानकारी दिए । ‘विदेशबाट आएकाहरुलाई बिशेष निगरानीमै होम क्वारेन्टिनमा राखिरहेका छौ,’ अध्यक्ष श्रीसले भने, ‘अब विदेशबाट आउने मात्र होइन, छिमेकी वडाहरुबाट आए पनि हामी वडाले बनाएको क्वारेन्टिनमा राख्छौ, लकडाउनको प्रभावकारी कार्यान्वयनमा लाग्छौ ।’
