आदर्श अनलाइन,बागलुङ
फितलो बन्दै गएको लकडाउनलाई जिल्लाभर थप कडाई गरिने भएको छ ।
जिल्ला कमाण्ड पोष्टको आयोजनामा बागलुङका १० वटै स्थानीय तहका प्रमुख, राजनीतिक दल, नागरिक समाज र सरोकारवाला सहितको बैठकले अहिलेको जोखिमको एक मात्र विकल्प प्रभावकारी लकडाउन भएको निष्कर्ष सहित यस्तो निर्णय गरेको हो ।
बैठकमा सहभागीले कोरोना जोखिम बढ्दै गए पनि लकडाउन फितलो भएको भन्दै थप कडाई गर्न सुझाव दिएका थिए । जिल्लामा दुई संक्रमित निको भए पनि गलकोटबाट गएका १४ मजदुरमा कोरोना संक्रमण देखिए पछि फेरी तरंगित बनेको छ ।
लकडाउनलाई प्रभावकारी बनाउन स्थानीय प्रहरी प्रशासन सहित स्थानीय तहको संयोजनमा मुख्य सदरमुकाम सहित बजार, छिमेकी जिल्लासँग सडक सञ्जाल जोडिएका नाकाहरुमा बिशेष निगरानी गर्ने र अनावश्यक आवागमनमा रोक लगाउने निर्णय बैठकले गरेको बागलुङका प्रमुुख जिल्ला अधिकारी गौलोचन शैजुले जानकारी दिनुभयो । बाहिरी जिल्लाबाट आउनेहरुको अनिवार्य रुपमा नाम, ठेगाना, सम्पर्क नम्बर सहित बिवरण राखेर क्वारेन्टाईनमा राख्ने निर्णय भएको प्रजिअ शैजुले बताउनुभयो ।
बागलुङ बजारसँग जोडिएको मालढुंगा नाका, प्रदेश नम्बर ५ को गुल्मी जिल्लासँग जोडिएको कालिगण्डकी कोरिडोरको पालुङ्खोला नाका, शान्पिुरसँग जोडिएको बरेङ बाटाचौर नाका, मुसिकोटसँग जोडिएको खर्वाङ नाका, रुकुम र रोल्पासँग जोडिएको भल्कोट नाका, म्याग्दीसँग जोडिएका लमान, ताराखोला र ढोरपाटन नगरपालिकाका नाका तथा म्याग्दीको रत्नेचौरसँग जोडिएको कुँडुले नाकामा निगरानी बढाउने निर्णय गरेको उहाँको भनाई छ।
