धौलागिरी अस्पतालले भन्यो-डेढ करोड खर्च होइन,जोखिम भत्ता

आदर्श अनलाइन, बागलुङ

धौलागिरी अस्पताल बागलुङले कोरोना भाइरस (कोभिड १९)को दुई जना संक्रमितको उपचारका लागि १ करोड ५३ लाख खर्च नभई असार मसान्त सम्मको प्रोत्साहन भत्ताका लागि प्रदेश मन्त्रालयमा प्रस्ताव मात्र गरिएको जनाएको छ ।

अस्पतालमा पत्रकार सञ्चारकर्मीसँगको कुराकानीमा निमित्त मेडिकल सुपरिटेण्डेन्ट डा.शैलेन्द्र बि पोखरेलले सरकारले व्यवस्था गरेको जोखिम भत्ताका लागि नियमानुसार प्रस्ताव गरी पठाइएको जानकारी दिए । ‘केन्द्र र प्रदेश सरकारले कोरोना जोखिममा अग्रभागमा खट्ने चिकित्सक स्वास्थ्यकर्मी र अन्य कर्मचारीका लागि बिशेष प्रोत्साहन भत्ताको व्यवस्था गरेकाले पठाउन निर्देशन थियो,’ डा.पोखरेलले भने, ‘हामीले निर्देशिकामा व्यवस्था भए अनुसार १ सय ६९ जनाका लागि चैत्र ९ देखि असार मसान्त सम्मको शत प्रतिशत, ७५ प्रतिशत र ५० प्रतिशत जोखिम भत्ता दिन १ करोड ५३ लाख प्रस्ताव गरिएको १८ हजार १ सय ५८ रुपैयाँ प्रस्ताव गरिएको हो ।’ दुई संक्रमितको उपचारमा कति खर्च भयो त भन्ने पत्रकारको प्रश्नमा ठुलो खर्च नभएको र पुरा हिसाव निकाल्न बाँकी रहेको लेखा शाखाले जनाएको छ ।

डा.पोखरेलका अनुसार, १ सय ६९ जना स्वास्थ्यकर्मी र कर्मचारी मध्ये १ सय १३ जनालाई शत प्रतिशत जोखिम भत्ताको व्यवस्था गरिएको छ । त्यस बाहेक २५ जनालाई ७५ प्रतिशत र ३१ जनालाई ५० प्रतिशत भत्ता सिफारिस गरिएको छ । ‘यो त निर्देशिका अनुसार यहाँबाट प्रस्ताव तयार गरेर पठाएको मात्र हो,’ अस्पतालका प्रशासन अधिकृत लालप्रसाद लामिछानेले भन्नुभयो, ‘निर्देशिकामा चैत्र ९ देखि असार सम्मको प्रस्तावित जोखिम भत्ता हो, तर उपचार खर्च भन्ने तर्फ बुझाई गएको देखिन्छ, त्यसो होइन ।’ चैत्र ९ देखि लागु भएको निर्देशिकामा पछिल्लो चार महिनाको जोखिम भत्ता दिने या कोरोना संक्रमितको उपचार अवधिको मात्र भन्नेमा चिकित्सक, कर्मचारी स्वयम्अन्यौलमा छन् । अर्को तर्फ ओपिडी लगायतका सेवा बन्द भएको र गम्भीर अवस्थामा बाहेक अस्पताल नआउनु भनेर सूचना सम्प्रेषण गरेको अवस्थामा पनि जोखिम भत्ता पाउने स्वास्थ्यकर्मीको संख्या अधिक देखिदाँ केहि प्रश्न उठेको छ । अब सञ्चार माध्यममै यो बिषय उठे पछि प्रदेश मन्त्रालयले गर्ने निर्णयनै अन्तिम हुने अस्पतालको भनाई छ ।

धौलागिरी अस्पतालका अध्यक्ष केवी राना मगरले स्वास्थ्यकर्मी जोखिमका बीच खटिरहेकाले नियमानुसार पाउने व्यवस्थालाई कसैले रोक्न नहुने बताउनुभयो । ‘यो जोखिममा अहोरात्र खटिरहेका छन्, उनीहरुलाई राज्यले जोखिम भत्ता व्यवस्थापन गर्नु राम्रो कुरा हो,’ रानाले भन्नुभयो,‘भत्ता सिफारिसमा गलत भए जस्तो लाग्दैन, भएमा हामी रोक्छौ । यो बेलामा स्वास्थ्यकर्मीको मनोबल उच्च बनाउने कुरामा ध्यान दिऊ, हामी समितिको तर्फबाट यसमा समन्वयकारी भुमिका खेलिरहेका छौ ।’