सम्पादकीय
जब सरकारमा रहेका दल या समर्थन गरेको कुनै राजनीतिक दलले समर्थन फिर्ता लिन्छ, तब सरकार अल्पमतमा पर्छ या अल्पमतमै नपरे पनि वर्तमान संवैधानिक व्यवस्था अनुसार विश्वासको मत लिने प्रावधान छ । सोही व्यवस्थाका कारण पछिल्लो डेढ दुई वर्षको कार्यकालकै बिचमा यसअघिका प्रधानमन्त्री माओवादी अध्यक्ष पुष्पकमल दाहाल ‘प्रचण्ड’ले चामत्कारिक रुपमा सत्ता समीकरण मात्र बदलेनन्, पटक–पटक संसदमा विश्वासको मत सामना गर्नुप¥यो । तर, उनले पाएको विश्वासको सुरुवाती मतको अनुपात र अहिले केही साता अघि मात्रै विश्वासको मत पाउन नसकेर सत्ताबाट बाहिरिनु परेको ताजा विगत छ । उसो त प्रचण्ड मात्रै होइनन्, अहिलेका प्रधानमन्त्री केपी शर्मा ओली स्वयंम् दुई तिहाई बहुमतको शक्तिशाली सरकारबाट अन्ततः साथ समर्थन गुमाउदै सत्ताबाट बाहिरिएको विगत छ ।
अहिले एउटै सत्ता समीकरणमा रहेर सरकार बनाएका एमाले माओवादी छुट्टिए । र अस्वभाविक जस्तो लाग्ने संसदका दुई ठुला दल नेपाली कांग्रेस र नेकपा एमालेले सरकार बनाएका छन् । जुन सरकारको बागडोर सम्हालेका प्रधानमन्त्री केपी शर्मा ओलीले प्रतिनिधिसभामा यसपटक पनि दुई तिहाइ सांसदको समर्थन पाएका छन् । प्रतिनिधिसभाका २७५ सदस्यमध्ये आइतबार ओलीले राखेको विश्वासको मत सम्बन्धी प्रस्तावको पक्षमा १८८ सांसदले मतदान गरे । विपक्षमा ७४ मत प¥यो भने एक मत तटस्थ रह्यो । संसद्मा आइतबार २६३ जना उपस्थित थिए । प्रधानमन्त्री ओलीलाई नेपाली कांग्रेस, नेकपा एमाले, जनता समाजवादी पार्टी, जनमत पार्टी, लोकतान्त्रिक समाजवादी पार्टी, नागरिक उन्मुक्ति पार्टी र केही स्वतन्त्र सांसदले मत दिए । नेकपा माओवादी केन्द्र, राष्ट्रिय स्वतन्त्र पार्टी, राष्ट्रिय प्रजातन्त्र पार्टी र एकीकृत समाजवादीले भने विपक्षमा मत दिए । नेपाल मजदुर किसान पार्टीका एक मात्र सांसद प्रेम सुवाल तटस्थ रहे ।
प्रधानमन्त्री ओली सत्तामा रहँदाका सकारात्मक नकारात्मक दुवै पक्षका बारेमा प्रंशसा र समर्थन गर्नेहरु छन् । भारतले नाकाबन्दी गर्दा समेत चट्टानी अडानका साथ राष्ट्रियताको पक्षमा उभिएको लगायतका विषयमा उनको प्रशंसा हुने गरेको छ भने संसद विघटन, गिरीबन्धु टी स्टेट प्रकरण लगायतको विषयले उनको चर्को आलोचना समेत हुने गरेको छ । अहिले उनै ओली चौथो कार्यकालका लागि सरकारको नेतृत्वमा पुगेका छन्, त्यो पनि मुख्य राजनीतिक प्रतिस्पर्धी नेपाली कांग्रेसको समर्थन र सहकार्यमा । मधेस लगायतका अरु केही दलहरुले समेत समर्थन जनाउँदा दुई तिहाइ बढीको बहुमत ओलीले प्राप्त गरेका छन् । यो राजनीतिक रुपमा उनी र उनको दल नेकपा एमालेका लागि महत्वपूर्ण सफलता हो । तर, यति उत्साहप्रद रुपमा देखिएको विश्वासको मतको विगत हेर्दा केही महिना र वर्षदिनमै उल्लेख्य संख्यामा घट्ने र सरकारबाट सत्ता च्युत हुनुपर्ने दुर्भाग्यपूर्ण अवस्था दोहोरिदिै आएको छ । यसमा प्रधानमन्त्री ओलीले विगतबाट यथेष्ट पाठ शिक्षा सिकेर नेपाल र नेपालीको हितमा यथोचित कदम चाल्न सकुन्, र फेरि अस्थिरताको कुरुप खेल संसदका दुई ठुला दलबाट कमसेकम ०८४ सम्म नहोस् ।
