आदर्श अनलाइन,बागलुङ
भारी वर्षा सँगै जिल्लाको ढोरपाटन नगरपालिकाको भुजीखोलामा गए राति आएको बाढीका कारण ४ जनाको मृत्यु भएको छ भने १३ जना बेपत्ता भएका छन् ।
स्थानीय जीवन पुनले दिएको जनाकारी अनुसार राति करिब १२ बजे भूजीखोलामा आएको बाढीले ढोरपाटन वडा नम्बर ५,६,७,८ र ९ का ३० भन्दा बढी घर बगाएको छ ।
बाढीमा परि मृत्यु भएका चारै जना पुरुष भए पनि नाम सनाखत भएको छैन । उनीहरुको शव कतै पुलको लठोमा अड्केको अवस्थामा फेला परेको छ भने कतै खोला किनारको बालुवामा भेटिएको छ ।
जिल्ला प्रहरी कार्यालय बागलुङका अनुसार बाढीमा बेपत्ता हुनेमा ढोरपाटन नगरपालिका ९ बस्ने बर्ष ३५ कि कौशला पुन , निजको छोरा बर्ष ६ को हिक्मत पुन, बर्ष ३५ को जीत बहादुर घर्ती, बर्ष ४० को राजु घर्ती , बर्ष २८ कुमारी बि.क., बर्ष १९ कि पुतली बि.क.,बर्ष ३२ कि करमती घर्ती मगर, बर्ष ३५ कि रीना घर्ती मगर, बर्ष ३५ कि दिलमाया घर्ती मगर, निजको नाम नखुलेका ६ बर्षीया छोरा रहेका छन् ।
यसैगरी बर्ष ५५ कि डोटी पुन, बर्ष ५२ कि टुलमती पुन, गलकोट नगरपालिका ४ घर भई ढोरपाटन घुम्न गएको बर्ष २४ का नविन भण्डारी बेपत्ता भएका छन् भने भण्डारी सँगै घुम्न गएका अन्य ३ जना सकुशल रहेको जिल्ला प्रहरी कार्यालयका प्रहरी नायव उपरिक्षक राजेन्द्र रेग्मीले जानकारी दिए । उनका अनुसार, अहिले सम्म ४ जनाको मृत अवस्थामा शव फेला छ भने अन्यको खोजी तथा उद्धार कार्य जारी छ । ‘रातिमा बाढी आएकाले ठुलो क्षति भएको पाइएको छ, घटनास्थलको दुरी र क्षेत्र निकै लामो भएकाले पनि समस्या भएको छ,’ डिएसपी रेग्मीले भने, ‘अहिले थप सुरक्षाकर्मी सहित घाइतेहरुको उद्धार, बेपत्ता भएकाहरुको खोजी शुरु गरिसकेका छौ ।’