आदर्श अनलाइन, बागलुङ
ठेकेदार कम्पनीले मङ्सिर २१ गते जिल्ला प्रशासन कार्यालय बागलुङमा मध्यपहाडी लोकमार्ग आयोजना कार्यालय पर्वतले गरेको अन्तरक्रिया कार्यक्रममा लिखित रुपमै २०७८ जेठ महिना भित्रै सडक कालोपत्रे गर्ने प्रतिबद्धता जनाएको छ ।
बागलुङ–घोडाबाँधे सडकको तल्लो खण्डको निर्माण जिम्मेवारी लिएको भारत सिद्धिसाई जेभीका आधिकारिक प्रतिनिधि दिपेन्द्र शाही र उपल्लो खण्डको ठेकेदार कम्पनी एमपी एसिएफ इसिसी जेभीका आधिकारिक प्रतिनिधि सुर्यबहादुर खड्काले अहिले भएको ढिलाई प्रति आत्मआलोचना गर्दै अबको ६ महिना भित्रै कालोपत्रेको काम सक्ने लिखित प्रतिवद्धता जनाएका हुन् ।
यसका लागि लोकमार्ग निर्माणमा देखिएका खानेपानीको पाइप, कच्चा पदार्थको अभाव, घर टहरा हटाउने र सवारी आवागमन लगायतका समस्यामा सबैको सहयोग र सहजीकरण भएमा जेठ भित्रै कालोपत्रे गर्ने बागलुङका जनप्रतिनिधि, राजनैतिक दल तथा सरोकारवाला निकाय संग प्रतिबद्धता जनाएको बागलुङका प्रमुख जिल्ला अधिकारी सुरेश न्यौपानले जानकारी दिनुभयो ।
