आदर्श अनलाइन, बागलुङ
नेपाल पत्रकार महासंघ बागलुङ शाखाको तालिम कक्षलाई व्यवस्थित गर्न दुई प्रवासीले सहयोग प्रदान गरेका छन् ।
‘हामी सबैको रहर, पत्रकार महासंघ बागलुङको घर’ अभियान मार्फत एक करोड रुपैयाँ बढि लागतमा निर्माण गरिएको सुविधा सम्पन्न भवनमा प्रविधीमैत्री तालिम कक्ष निर्माणका लागि सहयोग प्राप्त भएको महासंघले जनाएको छ ।
अन्तर्राष्ट्रिय बागलुङ समाजका तर्फबाट महासचिव देव पौडेलले मंगलबार महासंघ कार्यालयमा आयोजित कार्यक्रममा ५० हजार बराबरको प्रोजेक्टर तथा बागलुङ समाज बेल्जियमका अध्यक्ष राजु थापाले तालिम कक्षमा साउण्ड सिस्टम र आवश्यक फर्निचरका लागि नगद रु.२० हजार रुपैयाँ प्रदान गरेका छन् । बागलुङ बजार निवासी पौडेल र काठेखोला गाउँपालिका ४ तंग्राम निवासी (साविक तंग्राम गाविसका पूर्व अध्यक्ष समेत रहनुभएका) थापाले महासंघका अध्यक्ष दिल शिरीषलाई प्रोजेक्टर र नगद हस्तान्तरण गर्नुभएको थियो ।
सहयोग हस्तान्तरण पछि बोल्दै अन्तर्राष्ट्रिय बागलुङ समाजका तर्फबाट महासचिव देव पौडेलले हालै स्थापित समाजले जिल्लाको समृद्धि र विकासका लागि हातेमालो गर्ने बताउनुभयो । ‘योे मेरो र समाजको तर्फबाट सद्भाव मात्रै हो, सानो भए पनि महासंघको पवित्र कर्म र अभियानमा जोडिऔं भन्ने अभिप्रायले प्रोजेक्टर लिएर आएको हुँ’ महासचिव पौडेलले भन्नुभयो, ‘यसलाई भर्खर विस्तार हुँदै गरेको संगठनको माया भनेर बुझ्नु होला ।’ आगामी दिनमा पनि महासंघसँग समाजले गर्ने काममा सहकार्य र समन्वय गरिने उहाँले बताउनुभयो ।
बागलुङ समाज बेल्जियमका अध्यक्ष राजु थापाले समाजले स्वास्थ्य र शिक्षामा सहयोग गर्ने नीति बनाएका कारण महासंघलाई संस्थागत सहयोग गर्न नसके पनि व्यक्तिगत रुपमा सहयोग गरेर सद्भाव मिसाएको बताउनुभयो । ‘महासंघको गतिविधि देखेर कुनै न कुनै अभियानमा जोडिने इच्छा थियो,’ अध्यक्ष थापाले भन्नुभयो,‘यहाँको जे समस्या छ या आवश्यकता छ, त्यसको पुर्ति गर्नमा सहयोग पुग्ने हिसाबले थोरै सहयोग गरेका हौ ।’
पत्रकार महासंघ भवनमा अहिले प्रभु बैंकको सहयोगमा आधुनिक सूचना केन्द्र सञ्चालनमा छ भने सुविधा सम्पन्न सभाहल र तालिम कक्ष पनि निर्माणाधिन अवस्थामा छ । महासंघको अभियानका लागि बिदेशमा गठन भएका नेपालीहरुका संगठनले आफ्नो फजुल खर्च कटाएर सहयोग गर्ने क्रम जारी छ ।
