लोकेन्द्र निरासी, बुर्तिबाङ
कोरोना महामारीको दोस्रो लहर भयाबह बन्दै गएको अवस्थामा ढोरपाटन नगरपालिका गम्भीर बन्न नसकेको भन्दै जनताको जीवन रक्षाको लागि स्थानीयबासीले चिन्ता व्यक्त गर्न थालेका छन् । बागलुङ जिल्लाका अन्य स्थानीय पालिकाहरुले कोरोना भाइरसको रोकथामका लागि विभिन्न योजनाहरु बनाएर अगाडि बढेको अवस्थामा ढोरपाटन नगरपालिकाका पछिल्ला गतिविधि भने प्रायः शुन्य जस्तै देखिन्छ । कोरोना महामारी अझै भयाबह बन्दै गएमा के गर्ने भन्ने नगरपालिकासंग कुनै ठोस योजना समेत देखिदैन । छिमेकी पालिकाहरुले समेत पिसीआर टेस्ट, कन्ट्याक्ट ट्रेसिङ, आइसुलेसन निर्माण, अक्सिजनको व्यवस्था, स्वास्थ्य मापदण्डको पालना, चेकजाँचमा कडाई जस्ता कार्यहरु गरिरहँदा ढोरपाटन नगरपालिकाले यस सम्बन्धि खासै चासो दिएको देखिदैन ।
केही समय अगाडि प्राथमिक स्वास्थ्य केन्द्र बुर्तिबाङमा अक्सिजन सहितको १० बेडको आइसुलेसन कक्ष निर्माण गरिए पनि त्यो आफैमा पर्याप्त भने छैन । कोरोनाका गम्भीर विरामीहरु बढ्दै जाने हो भने यहाँ थेग्नै नसक्ने अवस्था आउन सक्ने बुर्तिबाङ प्राथमिक स्वास्थ्य केन्द्रका प्रमुख डा. मिलन मल्लले बताउनु भयो । प्राथमिक स्वास्थ्य केन्द्रमा अहिले अक्सिजन, पर्याप्त स्वास्थ्यकर्मी, स्वास्थ्य सामग्री एवं औषधी लगायत स्रोत साधनको समेत निकै कमी रहेको उहाँले बताउनुभयो । अलि बढी समस्या भएका र लक्षण देखिएका विरामीहरुको छिटोभन्दा छिटो पिसिआर टेस्ट गर्नुपर्ने, पर्याप्त अक्सिजन, औषधी उपचार एवं स्रोत साधनको व्यवस्थापनमा नगरपालिकाले विशेष ध्यान दिनुपर्ने उहाँको भनाइ रहेको छ । साथै अझै दुई तीन हप्ता सबै व्यक्तिहरु सचेत रहेर घरभित्रै बसी निषेधाज्ञा तथा स्वास्थ्य मापदण्डको पालना गर्न सके कोरोना संक्रमणलाई कम गर्न सकिने डाक्टर मल्लको भनाइ रहेको छ ।
बुर्तिबाङ प्राथमिक स्वास्थ्य केन्द्रमा अहिले १७ ओटा साना अक्सिजन सिलिण्डर मात्र छन् । ती पनि धेरैजसो स्थानीय निमार्ण व्यवसायीहरुको सहयोगमा संकलन गरिएको हो । तर अक्सिजन दिनुपर्ने विरामीको चाप बढ्दै जाने हो भने २४ घण्टा पनि थेग्न नसक्ने अवस्था देखिन्छ । अहिलेको मौजुदा अक्सिजनले ३ जना विरामीलाई २ दिन मात्र मुस्किलले राख्न सकिने अवस्था रहेको बताउँदैे जटिल खालका विरामीहरुलाई धौलागिरी कोभिड अस्पताल बागलुङमा पठाउने गरिएको र बुधबारदेखि विरामीको चाप अत्यधिक बढेकाले बागलुङले पनि विरामी नपठाउन भनेको ढोरपाटन नगरपालिकाका स्वास्थ्य संयोजक घनश्याम चालिसेले बताउनु भयो । यता नगरपालिकाको आदेश विना पिसिआर टेष्ट नगर्न भनेकाले लामो समयदेखि पिसिआर टेष्टलाई अगाडि बढाउन नसकिएको उहाँले बताउनु भयो ।
बुर्तिबाङ प्राथमिक स्वास्थ्य केन्द्रका ५ जना स्वास्थ्यकर्मी समेत विरामी भई अहिले होम आइसुलेसनमा रहेका कारण जनशक्ति अभाव भएको स्रोतले जानाकारी दिएको छ । ढोरपाटन नगरपालिकामा कोरोनाका सक्रिय संक्रमित कति छन् ? यस विषयमा नगरपालिका समेत अनविज्ञ छ । उता बुर्तिबाङ बजारमा प्रहरीले चेकजाँचलाई केही कडाई गरे पनि बुटवल र अन्य स्थानबाट आउने सामान ढुवानीका गाडिहरुमा लुकीछिपी आउने मानिसहरुको संख्या पनि त्यति नै बढ्दै गएको छ भने भारत लगायत अन्य विदेशबाट के कति मानिसहरु नगरपालिकामा भित्रिएका छन् र तिनीहरुको अवस्था के छ भन्ने विषयमा नगरपालिकासंग कुनै आधिकारिक तथ्यांक समेत रहेको छैन । यी सम्पूर्ण परिस्थितिलाई मूल्यांकन गर्दा अबको अवस्था अझै जटिल बन्न सक्ने भएकाले नगरपालिकाले समयमै योजना बनाएर युद्धस्तरबाट अगाडि बढ्नुपर्ने देखिन्छ ।