आदर्श अनलाइन, बागलुङ
जिल्लाको बागलुङ नगरपालिका–१४ नारायणस्थान १० दिनको लागि सिल गरिएको छ ।
बागलुङ नगरपालिकाको सिफारिसमा जिल्ला कोभिड संकट व्यवस्थापन केन्द्रको बैठकले आज राती १२ बजेदेखि लागु हुने गरी यहि साउन ३१ गतेसम्मलाई कडाइका साथ निषेधाज्ञा जारी गरेको हो ।
कोभिड–१९ को महामारी फैलिएसँगै निषेधाज्ञा जारी गरिएको प्रमुख जिल्ला अधिकारी शिव कुमार कार्कीले जानकारी दिनुभयो । नगरकार्यपालिकाको कार्यालयको पत्रानुसार डिसिएमसिको बैठकको सिफारिस, संक्रामक रोग ऐन २०२० को दफा २, स्थानीय प्रशासन ऐन २०२८को दफा ६ (३), कोभिड–१९ संकट व्यवस्थापन अध्यादेश २०७८ को दफा ४ एवं सुरक्षा समितिको बैठकले निषेधाज्ञा जारी गरेको हो ।
निषेधाज्ञाको अवधिमा अत्यावश्यक सेवा खाद्यन्न, तरकारी दुध, औषधी दाना, ढुवानी तथा एम्बुलेन्स सेवा, कृषि तथा पशु पन्छी उत्पादन, मल, बीऊ सेवा भने सञ्चालन गर्न पाईनेछ ।
स्वास्थ्य सेवा र विपद् व्यवस्थापनको सेवा तथा अत्यावश्यक सरकारी सवारी साधन बाहेक अन्य नीजि तथा सार्वजनिक यातायात र सम्बन्धित वडाका बजार क्षेत्र भित्र चलाउन पाईने छैन ।
संघसंस्था, बैङ्क तथा बित्तिय संस्था, सहकारी सेवा र वडा कार्यालयहरुको सेवा समेत हाललाई स्थागित गर्ने निर्णय गरिएको र शैक्षिक संस्था पूर्ण रुपमा बन्द रहने छन् ।
कालीगण्डकी करिडोर तथा अन्य सडक मार्गमा चल्ने यातायात सेवा उक्त वडाहरुमा चढ्न र झर्न नपाउने गरि सञ्चालन हुने व्यवस्था गर्नु पर्नेछ । बिबाह, ब्रतबन्ध एवं संस्कारजन्य कार्यक्रम सञ्चालन गर्दा स्वास्थ्य तथा सुरक्षा मापदण्ड अनिवार्य रुपमा पालना गर्ने गरि ७ जना भन्दा बढी व्यक्ति सहभागि हुन पाईने छैन ।
अवज्ञा गरेमा स्थानीय प्रशासन ऐन २०२८, कोभिड–१९ संकट व्यवस्थापन अध्यादेश २०७८ एवं अन्य प्रचलित कानुन बमोजिम कारबाही हुनेछ
