डम्मर बुढा मगर, बागलुङ
निसीखोलामा थुप्रै धार्मिक तथा पर्यटकीय क्षेत्रहरु छन् । त्यस मध्येक आधा दर्जन बढी चर्चामा छन् भने अझै दजर्नौँ मनमोहक गन्तव्यहरु गुमनाम छन् । पूर्वाधार विकास र प्रचारप्रसारका हुन नसक्दा ओझेलिएका त्यस पर्यटकीय गन्तव्यको गाउँपालिकाले प्रचारप्रसार र पूर्वाधार निर्माणमा जुटेको छ । प्युठान, रोल्पा, पूर्वी रुकुम जिल्ला र ढोरपाटन नगरपालिकासँग जोडिएको निसीखोलामा पर्यटकलाई आकर्षण गर्ने गन्तव्य धेरै भएको भन्दै यसको प्रचारमा जुटेको गाउँपालिकाका अध्यक्ष तारानाथ पौडेलले बताउनुभयो ।
पौडेलले पालिकाभित्र अनगिन्ति धार्मिक तथा पर्यटकीयस्थलहरू रहेको भन्दै तिनीहरूको प्रचार र विकासका लागि गाउँपालिकाले योजना बनाएर क्रमागत रूपमा विकास गर्दै आएको बताउनुभयो । ‘निसीखोला धार्मिक पर्यटकीइ हिसाबले अत्यन्तै महत्वपूर्ण पालिका मानिन्छ, यहाँ थुप्रै धार्मिक पर्यटकीय क्षेत्रहरु छन्, हामी जनप्रतिनिधि भएर आएदेखि निरन्तर प्रचारप्रसार र पूर्वाधार निर्माणमा जुटेका छौँ’ अध्यक्ष पौडेलले भन्नुभयो ‘पहिचान भइसकेका स्थलहरूमा पूर्वाधार निर्माण गर्ने र प्रचारप्रसार गर्ने र केही नयाँ गन्तव्यहरुको समेत खोजीमा छौँ ।’
गाउँपालिकाले रोल्पा र प्युठानसँग जोडिएको अन्तेढुङ्गा, पूर्वी रुकुमसँग जोडिएको रिग ताल, प्युठानसँग जोडिएको नांगे धुरी, कोठेभिरलगायतका पर्यटकीय क्षेत्रहरूको पहिचान गरी प्रचारमा जुटेको अध्यक्ष पौडेलको भनाई छ । गाउँपालिकाले प्युठानको गौमुखी र निसीखोला गाउँपालिकाको सिमानामा पर्ने नांगेको धुरीको विकासका लागि दुवै पालिका, जिल्ला र प्रदेश सरकारसँग सहकार्य गरेर विकास गर्ने पौडेलले बताउनुभयो ।
‘निसीखोलामा रहेका धेरैजसो पर्यटकीय तथा धार्मिक क्षेत्रहरू विभिन्न जिल्लाका सिमानमा रहेका छन्, त्यसले गर्दा दुवै पक्षले समन्वय सहकार्य गरेर विकास गर्दा राम्रो हुने हुँदा छलफल गरिरहेका छौँ, र आ–आफ्नो सिमानमा पर्ने स्थलको चाहिँ हामीले आफैँ योजना बनाएर काम सुरु गरेका छौँ’ अध्यक्ष पौडेलले भन्नुभयो । वडा नम्बर ६ मा पर्ने रिगताल, वडा नम्बर ३ मा पर्ने नौ बहिनी छहरा, वडा नम्बर ५ मा रहेको कोठेभीर, वडा नम्बर ६ मा रहेको साइलीमाइली झरना, वडा नम्बर ७ को नरसिंहकोट, वडा नम्बर २ को अर्नाकोट, वडा नम्बर ५ को निसेलढोर, वडा नम्बर ३ मा रहेको बराह मन्दिर निसीखोला गाउँपालिकाको प्रमुख गन्तव्य हुन् ।
नरसिंहकोट, रिगताल, अर्नाकोट, नौ बहिनी छहरा, कोठेभिर, नांगेधुरी, निसेल ढोरपाटनको विकासका लागि लागि गुरुयोजना तयार पारेको र केहीको काम सुरु भएको भन्दै अध्यक्ष पौडेलले आगमी वर्षसम्ममा धेरै पर्यटकीय गनतव्य पहिचान हुने र प्रचारमा आउने बताउनुभयो । अध्यक्ष पौडेलले गाउँपालिकावासीको पर्यटनबाटै जीवनस्तर उकास्न सकिने भन्दै अहिले त्यसको लागि जग तयार गर्न आफूहरू लागि रहेको बताउनुहुन्छ ।
पर्यटन प्रवद्र्धनका लागि यस वर्ष गाउँपालिकामा ४० लाखभन्दा बढी बजेट रहेको गाउँपालिकाका सूचना अधिकारी पुरुषोत्तम गौतमले जानकारी दिनुभयो । चालु आर्थिक वर्षमा वडा नम्बर ३ मा बराह मन्दिर निर्माणका लागि प्रदेश सरकारबाट १० लाख, केन्द्र सरकारबाट निरसिंहकोटको विकासका लागि सात लाख रुपैयाँ विनियोजन भएको गौतमको भनाइ छ । नरसिंहकोटमा गत वर्ष प्रदेश सरकारबाट २० लाख विनियोजन भएको र त्यसबाट वडा नम्बर ७ मा पूर्वाधार निर्माण गरेको गौतमले बताउनुभयो ।
उहाँले यहाँका स्थलहरूको विकासका लागि प्रदेश र केन्द्रबाट पनि बजेट विनियोजन भएको भन्दै यस वर्ष पूर्वाधार निर्माण र ओझेलमा रहेका गन्तव्यहरूको प्रचारप्रसारमा बढी जोड दिएको बताउनुभयो । गाउँपालिकाका प्रत्येक वडामा सम्भावना बोकेका धार्मिक तथा पर्यटकीयस्थलहरू रहेको भन्दै लोकमार्गले गर्दा तिनी पनि विस्तार बाहिर आउन थालेको गौतम बताउनुहुन्छ ।
निसीखोलालाई मध्य पहाडी लोकमार्गले मध्य भागबाट चिरेर पूर्वी रुकुमसँग जोडिएको हुँदा ओझेलमा परेका गन्तव्यहरू पहिचान गर्न यसले महत्वपूर्ण भूमिका खेलेको छ । लोकमार्गकै दायाँबाँया चारै तिर मनमोहक दृश्य र पर्यटकीय गन्तव्यले यात्रुलाई समेत मोहित गराएको छ ।