डम्मर बुढा मगर, बागलुङ
केही समय अगाडिसम्म युवा पुस्तामा राजनीतिप्रति तीव्र वितृष्णा थियो । राजनीतिमा प्रायः बुढापाकाहरुनै बढी हाबी हुने गरेका थिए । तर पछिल्लो समय राजनीतिमा युवा पुस्ताको आकर्षण निकै बढेको पाइन्छ । नेपाली कांग्रेस, नेकपा र नेकपा माओवादी केन्द्रको महाधिवेशनले पनि राजनीतिमा युवा आकर्षण बढेको देखायो । हालै सम्पन्न स्थानीय तहको निर्वाचनले पनि त्यो प्रमाणित गरेको छ ।
बागलुङका सन्दर्भमा पनि धेरै युवाहरु पार्टी नेतृत्व तथा स्थानीय पालिकाको नेतृत्वमा चुनिएका छन् । स्थानीय तहको निर्वाचनमा बागलुङमा धेरै युवाहरु निर्वाचित भएका छन् । केही गाउँपालिका अध्यक्ष, उपाध्यक्ष तथा केही नगरपालिकाको प्रमुख र उप्रमुखमा निर्वाचित भएको छन् । केही भने वडा अध्यक्ष र वडा सदस्यमा पनि निर्वाचित भएका छन् ।
बागलुङमा सबैभन्दा कम उमेरमा पालिकाको नेतृत्व तमानखोला गाउँपालिकाका अध्यक्ष जोकलाल बुढा मगरले गरेका छन् । यसभन्दा अगाडि पनि अध्यक्ष बनेर पालिकाको नेतृत्व गरेका बुढा मगर अहिले ३५ वर्षका भए । उनी यसभन्दा अगाडिको निर्वाचनमा निर्वाचित हुँदा ३० वर्षका थिए । युवा जोस र जाँगरका साथ विकट तमानखोलालाई विकासको गतिमा अगाडी बढाएका छन् ।
पालिका उपप्रमुख मध्ये सबैभन्दा कान्छो उपप्रमुख ढोरपाटन नगरपालिकाका नवनिर्वाचित उपप्रमुख धनबहादुर कायत (कल्याण) हुन् । कायत ३३ वर्षका भए । केही महिना अगाडी भएको नेपाली कांग्रेसको १४ औँ महाधिवेशनबाट ढोरपाटन नगरपालिकाको सभापतिमा निर्वाचित कायत विद्यार्थी कालदेखिनै राजनीतिमा होमिएका थिए ।
४० वर्ष मुनीका पालिका प्रमुख तथा उपप्रमुख बागलुङमा धेरै नै छन् । बरेङ गाउँपालिकाका अध्यक्ष कृष्णप्रसाद शर्मा पनि युवा नेतृत्वमै पर्छन् । यसभन्दा अगाडी पनि गाउँपालिकाको अध्यक्ष भएर नेतृत्व गरेका शर्मा अहिले ३८ वर्षका भए । उनी अघिल्लो पटक निर्वाचित हुँदा ३३ वर्षका थिए । शर्मा पनि बरेङ गाउँपालिकाको विकासमा निरन्तर लागेका छन् । अघिल्लो कार्यकालमा राम्रो छवि बनाएर शर्माले यस पटक पनि राम्रो गर्ने नागरिकले अपेक्षा गरेका छन् ।
त्यस्तै जैमिनी नगरपालिकाका उपप्रमुख हरिहर शर्मा, बडिगाड गाउँपालिकाका उपप्रमुख भिमशेन वन र तमानखोला गाउँपालिकाकी उपाध्यक्ष हिराकुमारी छन्त्याल पनि युवामै पर्छिन् । उनीहरु सबै ३८ वर्षका भए । वडा अध्यक्षमा धेरै युवाहरुनै निर्वाचित भएका छन् । ८५ वटा वडा रहेका बागलुङमा अधिकांश ४० वर्ष मुनिका छन् ।
त्यस मध्ये गलकोट नगरपालिका वडा नम्बर ५ का वडा अध्यक्ष पवन हमाल जिल्लामै सबैभन्दा कान्छा जनप्रतिनिधिमा पर्छन् । उनी २७ वर्षका भए । जिल्लामा ३० वर्षभन्दा कम उमेरका जनप्रतिनिधिहरु कमै छन् ।
तमानखोला गाउँपालिकाका अध्यक्ष जोकलाल बुढा मगरले बुढापाको अनुभव र सुझावलाई आत्मसाथ गर्न सके विकास गर्न सकिने बताए । अध्यक्ष बढा मगरले अघिल्लो कार्यकालमा बुढापाका र पूर्व जनप्रतिनिधिहरुको सल्लाह सुझाव र समन्वयमा विकासका गतिविधिलाई चुस्त बनाएको भन्दै यो कार्यकालमा पनि त्यसरीनै अगाडी बढ्ने बताए ।
उनले युवा जोसले समाज रुपान्तरणमा महत्वपूर्ण भूमिका खेल्न सक्ने र उनीहरुमा नयाँ र पृथक योजना हुने बताए । ‘युवामा केही काँचोपन भए पनि उनीहरुमा नयाँ र पृथक योजना हुन्छ, उनीहरुले पुराना पुस्तासँग सहकार्य गरेर उनीहरुको अनुभव र सुझावलाई आत्मसाथ गरियो भने विकास गर्न सजिलो हुन्छ’ अध्यक्ष बुढा मगरले भने ।
बरेङ गाउँपालिकाका अध्यक्ष कृष्णप्रसाद शर्माले पाका पुस्ताको प्रेरणाबाट युवाले परिवर्तन ल्याउन सक्ने बताए । उनले बुढापाकामा धेरै ज्ञान हुने र उनीहरुबाट सिकेका कुरा व्यवहारमा लागु गर्न सके समाज रुपमान्तरमा टेवा पुग्ने बताए । उनले यस अगाडिको कार्यकालमा उनीहरुसँग सुझाव लिएर विकास निर्माणमा जुटेको बताए ।
‘अग्रजहरु हाम्रा लागि ज्ञानका स्रोत हुन्, उनीहरुबाट ज्ञान लिएर युवा पुस्ताले नयाँ ढंगले योजना बनाएर काम ग¥यो भने त्यो विकास दीर्घकालीन हुन सक्छ,’ अध्यक्ष शर्माले भने ‘हामीले पनि उहाँहरुसँग सहकार्य गरेर विकास निर्माणमा जोड दिएका थियौँ, दिँदै जानेछौँ ।’