आदर्श अनलाइन, बागलुङ
यहाँ सञ्चालित इमेज बचत तथा ऋण सहकारी संस्था लि. बागलुङले दुई करोड ६० लाख ५४ हजार ९२ रुपैयाँ कुल आम्दानी गरेको छ । आर्थिक वर्ष २०७८÷०७९ मा संस्थाले उक्त आम्दानी गरेको हो । शनिबार बागलुङमा सम्पन्न भएको संस्थाको १० औं वार्षिंक साधारणसभामा संस्थाले उक्त कुल आम्दानीबाट विभीन्न शिर्षकका खर्च कटाएर ४५ लाख ६० हजार ७ सय ६९ रुपैयाँ खुद मुनाफा गरेको जनाएको छ । सहकारीले संस्थामा एक अर्ब १४ करोड ५८ लाख ६२ हजार तीन सय ५३ रुपैयाँको कुल सम्पत्ती भएको जनाएको छ ।
५०३ महिला र ३१७ जना पुरुष गरी कुल ८२० जना सेयर सदस्य रहेको उक्त सहकारीको तीन करोड ३३ लाख ४१ हजार दुई सय सेयर पूँजी रहेको छ । संस्थाले ९५ करोड २४ लाख ४० हजार ८ सय ४८ रुपैयाँको बचत संकलन गरेको जनाएको छ । संस्थाले हाल ७१ करोड बढि ऋण लगानी गरिरहेको संस्थाका अध्यक्ष देवकुमार नेपालीले बताए । उनले इमेज सहकारीमा तरलता अभाव नरहेको भन्दै बचतकर्तालाई चाहेको समयमा बचत फिर्ता दिएको बताए ।
संस्थाको साधारणसभा उद्घाटन गर्दै राष्ट्रिय सहकारी बंैंकका सञ्चालक रामबहादुर जिसीले कोरोना महामारीका कारण विश्वभर अर्थतन्त्र धरापमा परेको बेला सहकारी संस्थाको गतिविधिले आर्थिक क्षेत्र चलायमान हुन थालेको बताए ।
उनले इमेज सहकारीले बागलुङमा छोटो समयमै राम्रो छाप छोड्न सफल भएको भन्दै सहकारी संस्थाहरु सहकारी ऐन नियम र कानुन अनुसार चल्नुपर्ने बताए । कार्यक्रममा बागलुङ नगरपालिका शिक्षा शाखा प्रमुख धनप्रसाद पोख्रेल, बागलुङ नगरपालिका—२ का वडाध्यक्ष सुरज बोसेल, पत्रकार महासंघ बागलुङका पूर्व अध्यक्ष राजेशचन्द्र राजभण्डारी, साहित्यकार काजी रोशन लगायतले शुभकामना मन्तव्य व्यक्त गरेका थिए ।
इमेज बचत तथा ऋण सहकारी संस्था लि. बागलुङका अध्यक्ष देवकुमार नेपालीको अध्यक्षतामा सम्पन्न कार्यक्रममा स्वागत सहकारी पोखराका प्रवन्धक दीपक पौडेल र सञ्चालन योगेन्द्र विश्वकर्माले गरेका थिए । उक्त अवसरमा ७० वर्ष माथिका १४ जना ज्येष्ठ सेयर सदस्यलाई नगद सहित सम्मान गरिएको थियो । त्यसैगरी उत्कृष्ट कारोबार गर्ने अन्य १३४ जनालाई पनि सम्मान गरिएको थियो ।
