आदर्श अनलाइन, बागलुङ
राष्ट्रिय जनमोर्चाका अध्यक्ष एवं पूर्व उपप्रधानमन्त्री चित्रबहादुर केसीले मानव अधिकार प्राप्तका लागि नेपाली जनताले लगातार संघर्ष गरि रहेको बताउनुभयो ।
आइतबार बागलुङमा ७५ औँ अन्तराष्ट्रिय मानव अधिकार दिवसका अवसरमा नेपाल मानव अधिकार संगठन बागलुङ, जिल्ला प्रहरी कार्यालय बागलुङ र सामुदायीक प्रहरी सेवा केन्द्र गुठीको आयोजनामा बागलुङ बजारको ¥याली पछि आयोजना गरिएको कोणसभामा आयोजित कार्यक्रमलाई सम्बोधन गर्दै केसीले कमजोर नागरिकले वर्षौँदेखि अधिकारका लागि लडाइँ गरे पनि प्राप्त गर्न नसकेको बताउनुभयो ।
कुनै पनि नागरिकले मानव अधिकारको प्रत्याभूत गर्न नपाउँदा हरेक दिन नेपाली युवा विदेशिनु परेको उहाँको भनाइ छ । एउटा नागरिककोे गास, बास, कपाससँगै उसले देशमै गरि खान पाउने अधिकार हुने भन्दै पछिल्लो समय त्यो वातावरण नहुँदा दिनहुँ हजारौँ युवा बाहिरीनु परेको अध्यक्ष केसीले बताउनुभयो । मानव अधिकार रक्षाका लागि राष्ट्रिय जनमोर्चा वर्षौँदेखि लड्दै आएको र अहिले पनि आफूले संसदमा यस विषयमा आवाज उठाइ रहेको उहाँको भनाइ छ ।
कोणसभामा जिल्ला समन्वय समिति बागलुङका प्रमुख अमर थापा, बागलुङका सहायक प्रमुख जिल्ला अधिकारी चित्राङगत बराल, बागलुङ नगरपालिकाका उपप्रमुख राजु खड्का र द्वन्द्वपीडित जसोधा शर्माले शुभकामना मन्तव्य व्यक्त गर्नुभएको थियो ।
¥यालीमा आदर्श विद्यामन्दिर माध्यामिक विद्यालय बागलुङका कक्षा ११ र १२ का विद्यार्थी, प्रहरी र मानवअधिकार सम्वद्ध संघ संस्थाका प्रतिनिधीको सहभागिता रहेको थियो ।