डम्मर बुढा मगर, बागलुङ
राष्ट्रिय गौरवको आयोजना मध्यपहाडी लोकमार्गको वैकल्पिक सडक स्तरोन्नती गर्न थालिएको छ । लोकमार्गको पाखुट्टे–बायखोला–झिम्पा हुँदै निसी जोड्ने सडकलाई स्तरोन्नती गर्न थालिएको हो । वि.सं. २०७३ सालमा लोकमार्गको वैकल्पिक सडकका रुपमा बायखोला–झिम्पा सडकको ट्रायक खोलिएको थियो । उक्त सडक स्तरोन्नतीका लागि गत वर्ष केन्द्र सरकारको एक करोड ३० लाख र गाउँपालिकाको एक करोड तीस लाख गरि दुई करोड ६० लाख विनियोजन गरि काम भएको थियो ।
उक्त बजेटले स्तरोन्नतीको काम नसकिएपछि यस वर्ष केन्द्र सरकारले विनयोजन गरेको ५० लाख र गण्डकी प्रदेशले छुट्याएको ३० लाखले सडक स्तरोन्नती गर्न थालिएको निसीखोला गाउँपालिकाका सूचना अधिकारी पुरुषोत्तम गौतमले जानकारी दिनुभयो । पाँच वर्ष अगाडि निर्माण भएको वैकल्पिक सडक साँघुरो र जोखिमयुक्त रहेको हुँदा तीन वर्षदेखि निरन्तर स्तरोन्नतीको काम गरि रहेको उहाँको भनाइ छ । गत वर्ष सडक फाकिलो बनाउने, ठाउँ–ठाउँमा कल्भट र नाली निर्माणको भएको गौतमले बताउनुभयो । वैकल्पिक सडकका लागि गाउँपालिकाले अहिलेसम्म तीन करोड बढि रकम खर्च गरि सकेको उहाँको भनाइ छ ।
करिब २५ किलोमिटर सडकको ६० प्रतिशत मात्रै स्तरोन्नती भएको छ । वैकल्पिक सडक सुरुमा मध्यपहाडी लोकमार्गका लागि प्रस्तावित भए पनि अवरोध र विवादका कारण अर्को पट्टिबाट लगिएको थियो । यो सडकले ढोरपाटन नगरपालिका वडा नम्बर २ देखि निसीखोला गाउँपालिका वडा नम्बर ५ जोडेको छ । सडक साँघुरा र अप्ठ्राया भएको हुँदा स्तरोन्नती गर्न थालेको गौतमले बताउनुभयो । यो सडक गाउँपालिकाको गौरवको आयोजना अन्तरगत रहेको उहाँ बताउनुहुन्छ ।
वैकल्पिक सडक २०७३ मा साविक निसी, बोहोरागाउँ र देविस्थान गाउँ विकास समितिले दुई/दुई लाख, अर्थ मन्त्रालयबाट ४०, डोलीडार संस्थाबाट सात लाख, जिल्ला विकास समितिबाट आठ लाख गरि ६१ लाख रुपैयाँमा सडकको ट्रयाक खोलेको थियो । यो सडकले निसीखोला गाउँपालिका–२, ४ र ५ का हजारौँ नागरिकको दैनिकी फेरि दिएको छ ।
सडक डिभिजन कार्यालय बागलुङका सूचना अधिकारी अमर अधिकारीले यस सडक स्तरोन्नतीका लागि ठेक्का प्रक्रियम अगाडि बढेको भन्दै केही दिनमै काम सुरु हुने बताउनुभयो । केन्द्र सरकारले पचास लाख रुपयौँ विनियोजन गरेको हुँदा सो अनुसार स्टिमेट गरेर ठेक्का लगाउन सूचना प्रकाशन गरि सकेको र त्यो प्रक्रिया अन्तिम चरणमा पुगेको हुँदा यही महिनादेखि निर्माण कम्पनी काममा लाग्ने उहाँ बताउनुहुन्छ ।
निसीखोला गाउँपालिका–२ का स्थानीय भीमबहादुर खत्रीले वर्षौँ अगाडि खुलेको सडक हालसम्म पूर्ण रुपमा स्तरोन्नती नहुँदा यात्रा र ढुवानी गर्न निकै समस्या हुने गरेको बताउनुभयो । दुई वर्षदेखि स्तरोन्नती हुन थाले पनि हालसम्म आधा मात्रै सकड फराकिलो बनेको उहाँको भनाइ छ । सडक साँघुरो र गाडीनै गुड्न नमिल्ने हुँदा यस सडकमा कुनै पनि यातायातका साधान नगुड्ने खत्री बताउनुहुन्छ ।
“यो सडक खुलेको धेरै वर्ष भयो तर अहिलेसम्म पुरै स्तरोन्नती हुन सकेको छैन, पारी पट्टीको लोकमार्ग कालोपत्रे भइसकेर भत्किन थालेको छ, यो सडकको अवस्था निकै खराब छ,” उहाँले भन्नुभयो – “थोरै बजेट पर्दो रैछ, हरेक वर्ष काम त गर्छन्, तर त्यसले पूर्णता पाउन सकेको छैन, सम्बन्धित निकायले ध्यान दिन जरुरी छ, करोडौँ खर्च गरे सडक खुलाए तर अप्ठ्यारो हुँदा गाडी गुड्न सकेका छैनन् ।”
