आदर्श अनलाइन, बागलुङ
बागलुङमा आगलागी हुँदा दुई घर र दुई गोठ जलेर नष्ट भएका छन् । जिल्लाको बागलुङ नगरपालिका–१२ डाँडाखेतमा स्थानीय दधिराम पौडेल यदुनाथ पौडेलको घर गोठ जलेर नष्ट भएको हो । आगलागीमा परि दधिराम पौडेल घाइते हुनु भएको छ ।
घाइते पौडेललाई धौलागिरी अस्पताल बागलुङमा ल्याएर उपचार गरिएको बागलुङ नगरपालिकाका उपप्रमुख राजु खड्काले जानकारी दिनुभयो ।
बुधबार दिउसो दुई बजे डाँडाखेत सामुदायिक वनमा लागेको आगो बस्तीमा बस्दा घर गोठ जलेको उहाँको भनाइ छ । गोठ जल्दा पाँच वस्तुभाउ जलेर मरेको उपप्रमुख खड्काले बताउनुभयो । सामुदायिक वनमा लागेको आगोले डाँडाखेत गाउँनै जोखिममा रहेको उहाँ बताउनुहुन्छ ।
प्रहरी र स्थानीयले आगो नियन्त्रणमा ल्याउन खोजे पनि अहिलेसम्म नियन्त्रणबाट आउन नसकेको खड्काको भनाइ छ ।
