डम्मर बुढा मगर, बागलुङ
जिल्ला सदरमुकामदेखि बागलुङ बजारदेखि नजिकै रहेको काठेखोला गाउँपालिका–३ धम्जा देराली जोड्ने सडक स्तरोन्नति गर्न थालिएको छ । २५ वर्ष अगाडि ट्रयाक खुलेको सडकको यसै वर्ष स्तरोन्नति गर्न थालिएको हो । स्तरोन्नतिका ठेक्का प्रक्रिया अगाडि बढेको छ ।
मध्यपहाडी लोकमार्गको काठेखोलादेखि डुडियाँ–तंग्राम–धम्जा देउरालीसम्मको १८ किलोमिटर सडक स्तरोन्नति गरिने सडक डिभिजन कार्यालय बागलुङका इन्जिनियर अमर अधिकारीले जानकारी दिनुभयो । संघीय सरकारले चालु आर्थिक वर्षमा विनियोजन गरेको रु ९६ लाख ५३ हजार ५२३ लागतमा सडक फराकिलो, नाली निर्माण र ग्रोभेलिङ गरिने उहाँको भनाइ छ ।
साढे दुई दशकसम्म सडक स्तरोन्नति हुँदा काठेखोलाको वडा नम्बर ३, ४ र ताराखोला गाउँपालिकाका हजारौँ नागरिकले सास्ती खेप्नु परेको काठेखोला गाउँपालिकाका अध्यक्ष राजु थापाले बताउनुभयो । दुई वर्ष अगाडि गण्डकी प्रदेश सरकार र गाउँपालिकाको रु एक करोड लागतमा सडकको विभिन्न खण्डमा काम भएको उहाँको भनाइ छ ।
उहाँले भन्नुभयो – “सडक खुलेको लामो समय बित्यो, यतिका समयसम्म सडकको स्तरोन्नति नहुँदा नागरिकले सास्ती खेप्नु परेको थियो, अब सहज हुँदै जाने छ, गाउँपालिकाले सामान्य रुपमा साँघुरो ठाउँमा फराकिलो बनाउने र भत्किएको स्थानमा पर्खाल लगाएर निरन्तर गाडी संचालन हुने गराउँदै आएका थियौँ, अब पक्की नालीसहित ग्राभेलिङ हुने छ, जसले यातायताका साधान चल्न समस्या हुने छैन ।”
काठेखोला गाउँपालिका–४ का स्थानीय प्रेम बहादुर पुनले सदरमुकाम नजिकको गाउँ जोड्ने सडक अहिलेसम्म स्तरोन्नति नहुँदा सास्ती खेप्नु परेको बताउनुभयो । दिउँदमा धुलो उडाउँदै गाडी चले पनि बर्खाको सडक संचालन नहुने उहाँको भनाइ छ । उहाँले वर्षौँदेखि तंग्राम र धम्जाका स्थानीयहरु धुलो र हिलोमा सास्ती खेप्दै यात्रा गरेको स्मरण गर्नुभयो ।
स्थानीय कुल बहादुर विकले बर्खाको समयमा गाउँमा कोही अपरझट बिरामी परे ढोकोमा बोकेर अस्पताल लैजानुको विकल्प नभएको सुनाउनुभयो । बर्खाका झण्डै तीन महिना पहिरोले सडक बन्द हुँदै बजार जोड्ने मुख्य सडक स्तरोन्नतिपछि यात्रा गर्न र सामान ढुवानीमा सहज हुने उहाँ बताउनुहुन्छ ।
