डम्मर बुढा मगर, बागलुङ
आइतबार गण्डकी प्रदेश सभा सदस्य दीपेन्द्र बहादुर थापा र बागलुङ नगरपालिकाका प्रमुख वसन्तकुमार श्रेष्ठसहित झण्डै १०० अतिथि बजारदेखि रायडाँडा गाउँलाई बालमैत्री वडा घोषणा गर्न पुगेका थिए । बालमैत्री वडा घोषणापछि बागलुङ नगरपालिका– ११ का अध्यक्ष ज्ञानेन्द्र गौतमले कार्यक्रममा पुगेका पाहुनालाई चोयाको डोरीले बाँधेको रायो सागको मुठा मायाको चिनो भन्दै हातमा थमाउनुभयो ।
कलिलो सागको मुठा पाएपछि अतिथिहरु मुस्काउन थाले । वडा कार्यालयले मायाको चिनोका रुपमा गाउँका किसानले उत्पादन गरेको साग दिएपछि कार्यक्रममा सहभागी सबै खुसी भए । आयातित वस्तुलाई मायाको चिनोका रुपमा दिनुभन्दा गाउँको उत्पादन दिँदा पहिचान हुने हुँदा यहाँ उत्पादन भएको रायो साग कोशेलीका रुमा दिएको वडा अध्यक्ष गौतमले बताउनुभयो ।
वडा नम्बर ११ स्थित रायडाँडा, तमाखुबारी र धारापानीका किसानले उत्पादन गरेको सागलाई खरिद गरि मायाको चिनोको रुपमा दिएको अध्यक्ष गौतमको भनाइ छ । वर्षौँदेखि यहाँका किसानले रायो साग बिक्रीबाटै आम्दानी गर्दै आएकाले हुँदा यसको प्रचारप्रसारका लागि मायाको चिनोका साग हालेर दिइएको अध्यक्ष गौतमले बताउनुभयो ।
गौतमले भन्नुभयो – “रायो साग त हाम्रो वडाको पहिचान हो, यहाँ उत्पादन भएको रायोको साग अन्य ठाउँको भन्दा निकै स्वादिष्ट हुन्छ, धेरै उत्पादन हुने हुँदा किसानले यसबाट आम्दानी पन गर्दै आएका छन्, अब हामीहरुले रायडाँडालाई साग उत्पादनको ‘हब’ हो भनी चिनाउन जरुरी छ, त्यसले गर्दा हामीहरुले बाहिरबाट आउने पाहुनालाई कोशेली तथा उपहारका रुपमा साग दिने गछौँ ।”
बागलुङ नगरपालिकाका प्रमुख वसन्तकुमार श्रेष्ठले वडा नम्बर ११ ले राम्रो कामको सुरुवात गरेको बताउनुभयो । मायाको चिनोमा फजुल खर्च गर्ने प्रचलन चलेको बेला यस वडाले आफ्नो पहिचान बोक्ने चिजलाई उपहार दिन सुरुवात गरेको भन्दै अन्य ग्रामीण क्षेत्रका नागरिकहरुले पनि स्थानीय उत्पादनलाई कोशेलीका रुपमा दिन आवश्यक रहेको बताउनुभयो ।
बागलुङ नगरकै सबैभन्दा दुर्गम वडाका रुपमा रहेको रायडाँडा कृषिमा निकै सम्भावना बोकेको भन्दै पालिकाले यहाँका किसानलाई प्रोत्साहन गर्ने खालका कार्यक्रम ल्याई रहेको बताउनुभयो ।
“हामीहरुले किसानलाई प्रेरित गर्नु पर्छ, गाउँमा धेरै संभावना छ, तर पछिल्लो समय बसाइँसराइले गर्दा गाउँ बस्तीहरु रित्तिन थालेका छन्, यति राम्रो साग उत्पादन हुने ठाउँका किसान घट्दै छन्” नगर प्रमुख श्रेष्ठले भन्नुभयो – “हरेक नागरिकले आफ्नो गाउँ ठाउँको चिनारीलाई प्रचार गर्नुपर्छ, अहिले रायडाँडाले ग¥यो अब बागलुङका सबै गाउँलेले गर्न जरुरी छ ।”
