आदर्श सञ्चार, बागलुङ
पूर्व प्रधानमन्त्री तथा नेकपा (माओवादी केन्द्र)का अध्यक्ष पुष्पकमल दाहल ‘प्रचण्ड’ले आफ्नो पार्टीमा पछिल्लो समय जनताको आकर्षण बढेको बताउनुभएको छ । मंगलबार बागलुङमा आयोजित स्नेह मिलन कार्यक्रमलाई सम्बोधन गर्दै १८ महिना सरकारको नेतृत्व गर्दा गरेको कामले जनतामा भरोसा छरेको दाहालले बताउनुभयो ।
विगतका कमिकमजोरीलाई समिक्षा गरेर माओवादी केन्द्र अगाडि बढेको हुँदा वडा तहबाटै संगठन राम्रो हुँदै गएको उहाँको भनाइ छ । पछिल्लो समय सात वटै प्रदेशबाट माओवादी केन्द्रमा आउने नेता तथा कार्यकर्ताको संख्या ठूलो रहेको भन्दै अब पहिलो पार्टी बन्न धेरै समय नलाग्ने दाहालले दाबी गर्नुभयो ।
यो बेला माओवादीका लागि ठूलो अवसर आएको भन्दै सरकारलाई सही ट्रायकमा ल्याउन विपक्षी दलहरु एक ठाउँमा उभिएको उहाँको भनाइ छ । जनस्तरबाटै माओवादी सरकारले गरेको कामको प्रशंसा हुँन थालेको हुँदा कार्यकर्ताहरुले राम्रो कामको प्रचार गर्नु पर्नेमा दाहालले जोड दिनुभयो ।
उहाँले भन्नुभयो – “अहिले देशव्यापारी रुपमा नेकपा (माओवादी केन्द्र)ले नेतृत्व गरेको सरकारले गरेका कामको प्रचार छ, १८ महिना सरकारको नेतृत्व गरौँ, त्यस बेलाको कामले हामीप्रति जनताको भरोसा पैदा भएको छ, यही बेला हामीहरुले संगठनलाई थप बलियो तर्फ लाग्नु पर्छ, हामी देशैभरी दोस्रो पार्टी भएका छौँ, पहिलोमा उक्लिन धेरै समय लाग्ने छैन ।”
माओवादीनै परिवर्तनको वाहक भएको उहाँले दाबी गर्नुभयो । माओवादी सरकारले गरेको सुशासन, सामाजिक न्याय, आर्थिक समृद्धि र भ्रष्टचार विरोधका पक्षमा जनताको चासो रहेको हुँदा संगठन निर्माणमा थोरै मेहेनत गरे पाटीलाई पहिलो बनाउन समस्या नभएको अध्यक्ष दाहालले उल्लेख गर्नुभयो ।