आदर्श सञ्चार, बागलुङ
गण्डकी प्रदेश सरकारका मुख्यमन्त्री सुरेन्द्रराज पाण्डेले प्रदेशलाई समृद्ध बनाउने मुख्य आधार पर्यटन भएको बताउनु भएको छ । बुधबार बागलुङमा आयोजित धार्मिक सम्मेलन तथा ऐतिहासिक चैत्राष्टमी मेलालाई सम्बोधन गर्दै संभावना बोकेका क्षेत्रको प्रचारप्रसार र प्रवद्र्धनमा प्रदेश सरकार लागेको पाण्डेले बताउनुभयो ।
धार्मिक तथा पर्यटकीय हिसाबले गण्डकी प्रदेश अब्बल रहेको भन्दै हरेक वर्ष प्रदेश सरकारले करोडौँ रकम पूर्वधार निर्माण र प्रवद्र्धनमा लगानी गर्दै आएको उहाँको भनाइ छ । धार्मिक पर्यटकीय क्षेत्र घुम्न आउने पर्यटकलाई केही समय अडिने वातावरण बनाउँदा त्यसले प्रदेश र स्थानीय तहको अर्थतन्त्रमा महत्वपूर्ण भूमिका निर्वाह गर्ने पाण्डेले बताउनुभयो ।
देश बहुभासिक, बहुसांकृतिक र बहुधार्मिक राष्ट्र भएको भन्दै पाण्डेले धर्म र संकृतिका माध्यामबाट देशको भुगोल र प्रकृतिकोसमेत प्रचार गर्न सकिने उहाँको भनाइ छ । प्रदेश सरकारले धार्मिक पर्यटकीय क्षेत्रको देश विदेशमा प्रबद्र्धनको काम थालेको भए पनि स्रोत अभावका कारण सोचेजस्तो उपलब्धी हाँसिल हुन नसकेको उहाँ बताउनुहुन्छ ।
मुख्यमन्त्री पाण्डेले भन्नुभयो – “प्राकृतिक सुन्दरता र धार्मिक हिसाबले गण्डकी प्रदेश पवित्र छ, वर्षेनी हजारौँ विदेशी धार्मिक पर्यटक यहाँ आउँछन्, उनीहरुलाई धेरै दिन यस क्षेत्रमा टिकाउनका लागि अझै धेरै पूर्वाधार निर्माण गर्न जरुरी छ, सीमित स्रोत साधानका कारण एकै पटक धेरै काम गर्न सकिएको छैन, यद्यपी क्रमिक रुपमा गर्दै जाने छौँ ।”
मुख्यमन्त्री पाण्डेलले नेपाल, बहुभाषा, बहुधर्म, बहुसंस्कृति भएको देशमा धार्मिक सहिष्णुता विथोल्ने प्रयास भएको बताउनुभयो । पछिल्लो समय अराजकता मौलाउँदै गएको भन्दै यस्ता गतिविधिलाई नियन्त्रण गर्न जरुरी रहेको उहाँको भनाइ छ ।