आदर्श सञ्चार, बागलुङ
बागलुङको गलकोट जीप दुर्घटना हुँदा एक जनाको मृत्यु भएको छ भने तीन जना घाइते भएका छन् ।
गलकोट नगरपालिका–३ खसगाउँमा हटिया देखि कोटमैदानतर्फ जाँदै गरेको ग १ ज ६१०० नम्बरको जीप आज दुर्घटना हुँदा गलकोट नगरपालिका ११ रिघाका २२ वर्षिय विष्णु रानाको मृत्यु भएको हो ।
टाउको र शरिरको विभिन्न भागमा चोट लागेर घाइते हुनुभएका रानाको उपचारको क्रममा गलकोट नगर अस्पतालका चिकित्सकले मृत घोषणा गरेको जिल्ला प्रहरी कार्यालय बागलुङका सूचना अधिकारी प्रहरी नायव उपरिक्षक बिजय यादवले जानकारी दिनुभयो ।
यस्तै दुर्घटनामा परी गलकोट नगरपालिका–५ सर्दाखेतका २२ वर्षिय चालक राजन विक, गलकोट नगरपालिका–४ डाँडाखेतका १९ वर्षिय रमेश सुनार, गलकोट नगरपालिका–३ बोहराफाँटका १९ वर्षिय अशोक बोहरा घाइते हुनुभएको छ । घाइते तीन नै जना गलकोट नगर अस्पतालमा उपचार भईरहेको छ ।
जीप अनियन्त्रित भई सडकदेखि अन्दाजी १ सय २० मिटर तल खस्न गई दुर्घटना भएको हो ।