आदर्श अनलाइन/म्याग्दी
वडा स्तरीय पुरुष र खुल्ला भलिबल प्रतियोगिता प्रथम मोना कप-२०७६ को उपाधि घतान र जिल्ला भलिबल संघले जितेका छन् ।
म्याग्देली प्रवासी नेपाली संघ ९मोना०को आयोजनामा भएको वडास्तरीय पुरुष भलिबलमा घतान र खुल्ला महिला भलिबलमा संघले उपाधि जितेको हो।
अन्नपूर्ण गाउँपालिका-६ घोडेपानीमा बिहीबार भएको फाइनलमा घतानले बेनी नगरपालिका-५ पुलाचौरलाई सोझो तीन सेटमा पराजित गरेको थियो । भलिबल संघसँग पराजित अन्नपूर्ण गाउँपालिका महिला भलिबलमा दोस्रो भएको छ । पुरुषतर्फ १४ र महिलातर्फ ६ समूहले भाग लिएका थिए ।
असोज १२ गते बेनीमा उद्घाटन भएको प्रतियोगिताको फाइनल खेल पर्यटकीय स्थल घोडेपानीमा सञ्चालन भएको थियो । पुरुषतर्फ बिजेता र उपबिजेतालाई ट्रफि, मेडल, प्रमाणपत्र सहित नगद ८० हजार र ५० हजार रुपैयाँ पुरस्कार दिइएको संयोजक तेजेन्द्र बानियाले बताउनुभयो ।
महिलामा बिजेता र उपबिजेतालाई ५० हजार र तीस हजार पुरस्कार प्राप्त गरेका छन् । मोनाका संस्थापक प्रकाश पुन, नवनिर्वाचित अध्यक्ष ओमनारायण जुग्जाली, निवर्तमान अध्यक्ष चक्र थापालगायतले पुरस्कार वितरण गरेका थिए।