राम बहादुर जिसी, बागलुङ
आदर्श सञ्चार सहकारी संस्था लिमिटेड बागलङले शेयर सदस्य युक्तजंग राजभण्डारीको आमाको निधन प्रति दुख व्यक्त गर्दै शनिबार श्रद्धाञ्जली सभा सम्पन्न गरेको छ ।
बागलुङ नगरपालिका वडा नं. ३ निवासी राजभण्डारीकी आमा रत्नदेवी श्रेष्ठको असोज १० गते ८० वर्षको उमेरमा निधन भएको थियो । निधन भएको नवौं दिनको पुण्य तिथि पारेर आदर्र्श सञ्चार सहकारीले श्रद्धाञ्जली सभा सम्पन्न गरेको हो । संस्थाले शेयर सदस्य तथा सदस्यका परिवारको निधनमा प्रदान गरिने मृत्यु राहत रकम पनि हस्तान्तरण गरेको छ ।
संस्थाका सञ्चालक शान्ति श्रेष्ठ, सेयर सदस्यहरु सुरेश प्रसाद श्रेष्ठ र इश्वर मलेपतीले संस्थाको नियम अनुसार सेयर सदस्यका परिवारका सदस्यको निधनमा प्रदान गरिने ५ हजार रुपैया परिवारका सदस्यलाई हस्तान्तरण गर्नु भएको थियो । साविक धौलागिरि अञ्चलकै पहिलो सञ्चार सहकारीको रुपमा स्थापित आदर्श सञ्चार सहकारी संस्थाले सदस्य राहत कोष स्थापना गरी शेयर सदस्यको परिवारका सदस्यको निधनमा ५ हजार र सेयर सदस्यको निधन भएमा १५ हजार रुपैया मृत्यु राहत स्वरुप हस्तान्तरण गर्दै आएको छ ।
सूचना र सञ्चार अन्तर्गत धौलागिरि जागरण दैनिक र अग्रसर साप्ताहिक पत्रिका प्रकाशन गर्दै आइरहेको संस्थाले हालै आदर्श सञ्चार अनलाईन समेत सञ्चालनमा ल्याएको छ । संस्थाले वित्तीय, सञ्चार र सहकारी सम्बन्धी विभिन्न कार्यक्रमका साथै जनचेतनामुलक कार्यक्रमहरु सञ्चालन गर्दै आइरहेको छ ।
कार्यक्षेत्र विस्तार गरी गण्डकी प्रदेश स्तरीय सहकारी संस्थाका रुपमा विकास गर्न लागिएको संस्थाले यसै आर्थिक वर्षदेखि गण्डकी प्रदेशको राजधानी पोखराबाट अनलाइन सञ्चालन र वित्तीय कारोबार गर्ने तयारी गरेको संस्थाका सह–सम्पादक सिर्जना पन्तले बताउँनुभयो । संस्थाले सदस्यहरुको राहतका लागि सञ्चालन गरेको सदस्य राहत कोषसंगै आदर्श दैवी प्रकोप तथा सामाजिक उद्धार राहतकोष सञ्चालन गरेको छ ।
शेयर सदस्यहरुसंग वार्षिक १ सय ५० रुपैया संकलन गरी २०८५ सालसम्ममा १ करोड रुपैया पु¥याउने लक्ष्यका साथ सञ्चालन गरेको कोषको रकमको ब्याजबाट ७५ प्रतिशत शेयर सदस्य र तिनका परिवार तथा २५ प्रतिशत समुदायका अन्य व्यक्तिहरुको हितमा लगाइने संस्थाका अध्यक्ष हुमाकुमारी जि.सी. (अञ्जु)ले जानकारी दिनुभयो ।
१ हजार ५ सय जना शेयर सदस्य, ३ करोड २५ लाख शेयर रकम, १७ करोड वचत र १८ करोड ५० लाख कर्जा लगानी रहेको संस्थाको वासलात २१ करोडको रहेको संस्थाका कोषाध्यक्ष पूर्णबहादुर कार्कीले जानकारी दिनुभयो ।
